Traballadores mostran a parte "máis humana" do peche de alcoa: "Hai xente que sofre"

Varias decenas de traballadores da factoría coruñesa de Alcoa estiveron presentes este domingo en 'Os rostros de Alcoa', un acto organizado polo Concello da Coruña no marco do programa 'Tribuna Pública', "que pretende dar a coñecer ás persoas que loitan por manter os seus empregos".

Ante case un centenar de persoas, os traballadores da multinacional do aluminio mostraron a parte "máis individual" e "máis humana" do posible peche da factoría.

Tal como asegurou a Europa Press o presidente do comité de empresa da fábrica de Alcoa na Coruña, Juan Carlos López Corbacho, os empregados da fábrica "seguen mobilizados" e "queren sensibilizar á opinión pública para que saiban que detrás dun ERE non hai só números".

"Detrás de cada número hai un traballador, unha familia, unha vida que depende dese posto de traballo. Tamén queremos estender esta visión a outros conflitos que non son tan visibles como o noso", sinalou López Corbacho.

Así, o presidente do comité de empresa subliñou que detrás de cada manifestación "hai persoas que sofren", así como "familias que o pasan mal", polo que os traballadores "non son simples números".

XUNTANZA

Por outra banda, o presidente do comité de empresa da factoría de Alcoa na Coruña, Juan Carlos López Corbacho, anunciou que este luns, día 25 de febreiro, os representantes dos traballadores da compañía reuniranse ás 10,00 horas co conselleiro de Economía, Francisco Conde, para "buscar unha saída á fábrica" e "manter os postos de traballo".