Por Europa Press / Redacción | A CORUÑA | 15/03/2019 | Actualizada ás 10:04
A cidade da Coruña acollerá este domingo, 17 de marzo, unha nova concentración das Mareas Brancas para defender unha "sanidade pública" e de "calidade" en Galicia. Segundo informou a Coordinadora Antiprivatización da sanidade pública A Coruña, como cada terceiro domingo de cada mes este 17 de marzo realizarán unha mobilización ás 12,30 horas no Obelisco na cidade herculina.
"Como non podía ser doutra maneira, o novo modelo de Atención Primaria que presenta Feijóo non gusta nin aos seus", sostén a Coordinadora, que chama a acudir á mobilización deste domingo para "gritar" con eles "a sanidade non se vende, a sanidade deféndese".
Ademais, avanzan que falarán este domingo "do que debe ser unha Atención Primaria" e da "contestación do Sergas sobre as listas non estruturais" á súa pregunta, sobre que pasa coas persoas que se negan a ir á privada.
MÉDICOS EN FOLGA
Por outra banda, médicos de Atención Primaria da Coruña acordaron sumarse á folga proposta para o mes de abril pola coordinadora que agrupa en Galicia a este colectivo.
Así o informou a Europa Press o portavoz da coordinadora coruñesa, Ramón Beiras, tras unha reunión celebrada á última hora da tarde deste xoves.
A Coordinadora Galega de Atención Primaria acordou, nun encontro mantido esta semana, propor a convocatoria dunha primeira xornada de folga xeral na Atención Primaria de Galicia para os días 9, 10 e 11 de abril.
Ese foi o resultado dunha reunión na que participaron membros das diferentes asembleas das áreas sanitarias de Galicia, sociedades científicas, membros de SOS Sanidade Pública e da Asociación para a Defensa da Sanidade Pública, así representantes dos xefes de servizo dimitidos de Vigo e da PAC, entre outros.
Os integrantes manteñen como "irrenunciables" os cinco puntos reclamados para mellorar, de acordo coas súas demandas, a Atención Primaria e a "negociación en pé de igualdade" dos mesmos, directamente coa Consellería de Sanidade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.