Por E.P. | SANTIAGO DE COMPOSTELA | 22/03/2019 | Actualizada ás 17:28
A presidenta da Deputación de Pontevedra, Carmela Silva, anunciou a programación da xornada anual da Escola de Igualdade María Vinyals que en 2019 centrarase no tema 'Muller e poder'. Este venres abriu o prazo de inscrición para asistir a esta actividade, que terá lugar o mércores 3 de abril.
Carmela Silva destacou este venres que a Escola contará coa presenza de "grandes mulleres a nivel galego e nacional", e citou a Laura Freixas, Berta Fernández, Altamira Gonzalo, Montserrat Boix, Desirée Vila e África González. O obxectivo de 'Muller e poder', segundo explicou Silva, é construír un espazo no que compartir experiencias e coñecementos referidos ao exercicio da responsabilidade e toma de decisións.
Ademais quere facilitar a posta en común de boas prácticas e modelos na xestión de persoas e equipos, na xestión do poder e na propia autogestión persoal desde a perspectiva de xénero. Nesta xornada preténdese trasladar de maneira práctica "todo o que significa e implica ser muller en diferentes ámbitos de poder" desde a ciencia e a tecnoloxía, a cultura, a empresa, o deporte, os medios de comunicación ou a política, asegurou a presidenta.
As conferenciantes achegarán as súas experiencias, incidirán nos obstáculos que dificultan o acceso a espazos de decisión e postos de responsabilidade e reflexionarán sobre novos estilos de liderado. "Onde temos que ter o 50% do protagonismo", dixo Carmela Silva. A xornada está dirixida principalmente a persoal da administración local e dos Centros de Información á Muller (CIM), así como a persoas que traballan a favor da igualdade e contra as violencias machistas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.