A débeda galega subiu un 1,18% no cuarto trimeste do ano
Marca máximo no conxunto das administracións públicas, no 97,2%, no terceiro goberno de Feijóo.
Por Europa Press / Redacción | Santiago de Compostela | 29/03/2019 | Actualizada ás 14:46
A débeda pública de Galicia subiu un 1,18% no cuarto trimestre de 2018 en relación ao mesmo período do ano anterior, de modo que terminou o exercicio en 11.342 millóns de euros, un 18% do produto interior bruto (PIB) galego.
A débeda das empresas públicas da comunidade quedou, mentres, en 7 millóns de euros, fronte aos 13 millóns que rexistraba no cuarto trimestre de 2017.
Do total da débeda galega, 2.133 millóns correspóndense con valores representativos de débeda e 9.209 con préstamos, dos cales 1.421 proceden de institucións financeiras residentes e 901 do resto do mundo, fronte a 6.515 do fondo de financiamento a comunidades autónomas.
Mentres, a débeda do conxunto das administracións públicas incrementouse en 2018 ata os 1.173.988 millóns de euros, co que marcou novo máximo histórico e pechou o exercicio no 97,2% do PIB, nove décimas menos que 2017 pero tres décimas por encima do obxectivo marcado polo Goberno do 96,9% do PIB, segundo os datos publicados este venres polo Banco de España.
A XUNTA SACA PEITO
Pola súa banda, a Consellería de Facenda reivindica que 2018 é o segundo ano consecutivo no que baixa o cociente de débeda/PIB de Galicia, que quedou no 18% ao peche do ano.
"Estes datos ratifican que Galicia volveu cumprir o límite de débeda fixado polo Ministerio de Facenda, que era do 18,4%", sinala o departamento autonómico nun comunicado. Engade que a comunidade se mantén así como a terceira de réxime común con menor cociente e que ten 3.970 millóns menos que a media autonómica.
DATOS GLOBAIS
En concreto, a taxa de crecemento do saldo de débeda foi do 2,6% en termos interanuais e, utilizando o PIB nominal de 2018, o cociente de débeda sobre PIB situouse no 97,2% no cuarto trimestre de 2018, un punto porcentual menos que en 2017, pero tres décimas por encima da meta marcada polo Goberno.
En termos absolutos, a débeda pública alcanzou o seu nivel anual máis alto da historia, con 1,174 billóns de euros, por encima do exercicio 2017 (1,144 billóns de euros), 2016 (1,107 billóns de euros) e 2015 (1,073 billóns de euros).
O Ministerio de Economía destacou nunha nota que, unha vez que o INE publicou os datos definitivos de crecemento do PIB en 2018 e o Banco de España os datos anuais de débeda segundo o procedemento de déficit excesivo (PDE), confírmase que o cociente débeda sobre PIB reduciuse ata o 97,16% do PIB, un punto porcentual menos que en 2017.
Segundo Economía, a cifra definitiva viuse afectada o dato do PIB nominal publicado este venres e un axuste final na cifra de débeda de contabilidade nacional debido á reclasificación contable como débeda PDE de operacións realizadas con anterioridade.
Esta reclasificación viuse, no entanto, compensada por unha "eficiente xestión" do Tesouro Público, que en 2018 traduciuse nun volume de emisións 5.700 millóns de euros inferior ao previsto e un aforro de 1.500 millóns de gasto de intereses, indicou o departamento que encabeza Nadia Calviño.
AS COMUNIDADES SEGUEN ELEVANDO A SÚA DÉBEDA
Dentro das comunidades autónomas, Cataluña (78.732 millóns de euros), Comunidade Valenciana (47.084 millóns), Andalucía (35.409 millóns) e Madrid (33.270 millóns) seguen concentrando dous terzos de toda a débeda en mans dos gobernos autonómicos no terceiro trimestre. No entanto, o catro máis endebedadas reduciron o importe en termos absolutos.
