Ofrecen 1.200 euros para descubrir quen disparou mortalmente a un gato en Vilagarcía
Animalistas instan á Xunta "a facer cumprir a Lei de Benestar Animal e desenvolver campañas preventivas" para "evitar auténticas animaladas".
Por Europa Press / Redacción | PONTEVEDRA | 04/04/2019 | Actualizada ás 10:44
O descubrimento por parte Protección Civil este martes dun gato tiroteado na contorna de Cornazo, no termo municipal de Vilagarcía de Arousa (Pontevedra), e o seu posterior sacrificio por mor da "gravidade do acto", levou á Asociación Animalista Libera e á Fundación Franz Weber a pór en marcha unha nova gratificación económica de 1.200 euros por datos que "permitan pechar o caso" e "pescudar quen disparou mortalmente" ao felino.
Os animalistas alertaron, nun comunicado de prensa, acerca da "sucesión de casos de malos tratos animais empregando armas de fogo". Así, lembrou "a cadeliña preñada, tiroteada e tirada a unha tubaxe de pluviais en Pontevedra, un gato doméstico morto durante unha cazaría en Carballo (A Coruña) ou a cadela á que rebentaron o fuciño dun disparo no municipio de Verín (Ourense)". "Ningún destes actos foi resolto ata o momento", lamentaron.
Desta forma, consideran que "o modelo de recompensa económica pode ser unha ferramenta útil para tratar de incentivar" os testemuños daquelas persoas que "puideron presenciar o disparo ao gato en Vilagarcía, nunha contorna urbana, e onde se puxo en risco a seguridade cidadá, ao efectuarse polo menos un disparo nun espazo prohibido para a caza", abundan os animalistas.
Eses colectivos sinalan que "o responsable ou responsables deste covarde acto de malos tratos animais" poden "enfrontarse, en vía administrativa a sancións de ata 30.000 euros, a hipotética retirada da licenza de caza e a inhabilitación para a tenencia de animais por un máximo de dez anos".
No terreo xudicial, o Código Penal contempla penas de ata dous anos de prisión e a inhabilitación para tenencia, comercio ou profesión relacionada con seres vivos cun máximo de 36 meses, lembran.
"EVITAR ANIMALADAS"
Os defensores dos animais puxeron a disposición de posibles probas o correo electrónico galicia@liberaong.org "coa esperanza de que algunha persoa contemplase o terrible suceso que terminou con outra vida animal", subliñan.
De forma paralela instaron á Xunta de Galicia "a facer cumprir a Lei de Benestar Animal e desenvolver campañas preventivas e de sensibilización" para "evitar a proliferación de auténticas animaladas contra animais, como os casos dos últimos dous anos".
