Novo servizo de atención psicolóxica de garda para vítimas de violencia de xénero
A Administración galega e o Colexio de Psicoloxía asinan dous convenios ao amparo do Pacto de Estado contra esta secuela.
Por E.P. | SANTIAGO DE COMPOSTELA | 08/04/2019 | Actualizada ás 15:02
A Xunta e o Colexio de Psicoloxía de Galicia asinaron este luns un convenio para a posta en marcha dun servizo nos xulgados de quenda de garda de asistencia psicolóxica especializada e permanente para mulleres vítimas de violencia de xénero e para os seus fillos.
A atención, que é "pioneira" e xa se desenvolveu de forma piloto, terá carácter "inmediato" para, a requirimento das forzas e corpos de seguridade, prestar asistencia deste tipo ás vítimas e as persoas dependentes delas desde o primeiro momento, as 24 horas do día e todos os días o ano en calquera partido xudicial galego.
A decana do Colexio de Psicoloxía de Galicia, Rosa Álvarez, destacou que este tipo de asistencia é unha das máis demandadas polas vítimas. "Cando unha muller acode a unha comisaría ou sofre unha agresión grave, debería estar acompañada por un profesional, para empezar a atención especializada, desde o primeiro momento", dixo a decana.
Por outra banda, o vicepresidente da Xunta, Alfonso Rueda, e Rosa Álvarez tamén asinaron outro convenio ao amparo do Pacto de Estado contra a Violencia de Xénero para "seguir avanzando" no cumprimento das medidas dunha iniciativa que Rueda eloxiou pola súa capacidade de "unir" diferentes sensibilidades políticas.
DOUS PROGRAMAS DE LONGO PERCORRIDO
Este segundo convenio recolle, á súa vez, dous programas en colaboración co Colexio de Psicoloxía que xa contan cun amplo percorrido en Galicia: o destinado á asistencia psicolóxica de mulleres vítimas de violencia de xénero e dos seus fillos e o orientado á reeducación de homes con condutas agresivas que non fosen condenados.
