Unha ruta guiada permitirá coñecer a vida do mestre represaliado Antonio Fraguas en Santiago

O homenaxeado este ano no Día das Letras Galegas tivo un vínculo moi importante coa capital galega.

Por Europa Press / Redacción | SANTIAGO DE COMPOSTELA | 07/05/2019 | Actualizada ás 13:10

Comparte esta noticia

Santiago foi un dos puntos máis importantes na traxectoria vital do intelectual Antonio Fraguas. É por iso que con motivo da súa homenaxe este 17 de maio, o Goberno local decidiu impulsar unha ruta guiada que permitirá coñecer un pouco máis do vínculo que mantiña o docente e etnógrafo coa capital galega, de onde é fillo adoptivo e mesmo conta cunha rúa e un centro educativo co seu nome.

A iniciativa foi presentada este martes en rolda de prensa pola concelleira de Acción Cultural, Branca Novoneyra, e percorrerá diversos emprazamentos da cidade relacionados coa vida do propio Fraguas, como o Museo do Pobo Galego ou o IES Rosalía de Castro, onde impartiu aulas.

Novoneyra lembrou a Fraguas como "un camiñante da cidade" e "moi lembrado" pola xente da cidade, onde aínda perviven xeracións que puideron gozar da súa docencia. Deste xeito, a ruta, que se celebrará durante seis días, permitirá coñecer esa faceta de mestre, e ao mesmo tempo aqueles lugares emblemáticos onde se situaron as institucións nas que traballaba, como o Seminario de Estudos Galegos ou o Instituto Pai Sarmiento.

Precisamente, segundo explicou María Abelleira, o paseo esta deseñado en sete paradas, partindo do Museo do Pobo Galego, entidade que Fraguas axudou a impulsar e na que se conserva gran parte do seu legado investigador.

Os participantes visitarán despois a Praza Feijóo, onde se situaba unha pensión na que o autor residiu na súa época de estudante, ademais da Facultade de Xeografía e Historia, que centro a súa relación coa universidade.

Outros emprazamentos destacados que abarcará esta ruta guiada serán o Colexio de Fonseca e a Árbore da Ciencia, antigas localizacións do Seminario de Estudos Galegos e o Instituto Pai Sarmiento, e onde se abordará a represión sufrida tras o golpe militar, que foi determinante no transcurso vital do homenaxeado.

Posteriormente, a comitiva dirixirase ao IES Rosalía de Castro, centro no que Fraguas impartiu clases e no que deixou pegada en decenas de mozas, para finalizar na Carballeira de Santa Susana, pondo en valor o traballo etnográfico do intelectual de Cotobade.

MESTRE REPRESALIADO

A concelleira de Acción Cultural destacou o "forte" vínculo de Fraguas coa capital galega, onde foi "moi recoñecido en vida". Tamén considerou que a figura do autor é unha oportunidade para recoñecer a todos os "mestres represaliados" tras o golpe militar franquista, dado que Fraguas, ademais de ser humillado publicamente, estivo 20 anos sen cátedra, e non puido volver ata aprobar de novo as oposicións.

O calendario de paseos guiados, que será gratuíto previa inscrición, arrinca este venres, ás 19.00 horas, e tamén se celebrarán dous paseos o sábado e o domingo ás 18.00 horas.

A ruta guiada volverá o 16 de maio, ás 19.00 horas, e haberá dúas sesións a maiores, o 17 de maio (17.00 horas) e o sábado, ás 18.00 horas.

Antón Fraguas, homenaxeado do Día dás Letras de 2019. RAG - Arquivo
Antón Fraguas, homenaxeado do Día dás Letras de 2019. RAG - Arquivo

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta