O BNG augura que será "a sorpresa" das municipais en Santiago
Pontón arroupa a Goretti Sanmartín nun mitin na capital galega, onde apelan a trasladar a Santiago "o modelo BNG".
Por E.P. | Compostela | 16/05/2019 | Actualizada ás 21:37
O Bloque Nacionalista Galego (BNG) augura que se converterá en "a sorpresa" das próximas eleccións municipais en Santiago de Compostela despois dun último mandato, coa Compostela Aberta de Martiño Noriega á fronte, marcado "pola decepción" e a "parálise".
Nun mitin celebrado no Centro Sociocultural de San Marta da capital galega ante 300 persoas, a líder frontista, Ana Pontón, arroupou á candidata á alcaldía santiaguesa, Goretti Sanmartín, e avisou que o Bloque non actuará como "muleta" de ningún partido na corporación santiaguesa, cidade á que queren trasladar "o modelo BNG" que se converteu en "referencia internacional".
"Non é momento de resignarse con fórmulas do pasado nin conformarse con aqueles que só trouxeron decepción", aseverou a portavoz nacional do Bloque, que deu paso ao número un da formación frontista en Santiago, quen incidiu en que o "camiño" que pasa polas municipais e europeas do 26 de maio "culmina" nas eleccións autonómicas nas que Pontón "será alternativa" ao popular Alberto Núñez Feijóo.
