Jácome (Democracia Ourensana), novo alcalde de Ourense: "A Alcaldía é máis importante que unha substitución na Deputación"

O líder de Democracia Ourensana foi investido alcalde en primeira votación co apoio do Partido Popular. O alcalde saínte, Jesús Vázquez, rexeita entrar nun goberno bipartito e descarta dimitir.

Por Europa Press / Redacción | SANTIAGO DE COMPOSTELA | 15/06/2019 | Actualizada ás 12:16

Comparte esta noticia

O líder de Democracia Ourensana (DO), Gonzalo Pérez Jácome, foi investido alcalde de Ourense en primeira votación grazas aos sete edís da súa formación e os sete do Partido Popular, cos que sumou a maioría absoluta.

Gonzalo Pérez Jácome recibe o bastón de mando de Ourense
Gonzalo Pérez Jácome recibe o bastón de mando de Ourense | Fonte: EFE.

A súa investidura prodúcese menos de 24 horas despois da firma dun acordo co PP para que a Alcaldía a teña Jácome a cambio dos votos de DO para que José Manuel Baltar continúe como presidente da Deputación.

"A Alcaldía é máis importante que producir unha substitución na Deputación", valorou o recentemente elixido rexedor ourensán, quen chegou a proferir insultos e fortes críticas contra o goberno provincial de Baltar tanto nos últimos anos como na campaña para as municipais.

No seu discurso de investidura, Jácome marcouse dous "enormes retos" que radican en que "en Ourense se poida vivir", xa que, segundo as súas palabras, a urbe está "moribunda".


JESÚS VÁZQUEZ REXEITA ENTRAR NO GOBERNO

O alcalde saínte de Ourense, Jesús Vázquez Abad, adiantou este sábado que "non formará parte" do goberno bipartito con Democracia Ourensana (DO), a pesar de que os votos do PP lograsen que Gonzalo Pérez Jácome sexa o novo rexedor da capital provincial.

No entanto, e tal e como desvelou tras a constitución da corporación municipal, iso non significa que vaia a deixar a acta de edil electo nas eleccións municipais e descartou dimitir como presidente do PP local: "Eu teño que, de momento, seguir á fronte".

O alcalde saínte desexou ao recentemente electo rexedor que "non teña que pasar" polo que pasou o seu goberno en minoría durante a última lexislatura, cunha oposición "moi dura". "Espero que Jácome non teña que pasar polo que me fixo pasar a min cando estaba na oposición", recalcou.

Vázquez Abad xustificou este pacto con DO pola "necesidade" de dotar á cidade dun goberno "de maioría". Neste sentido, negou que o acordo responda a "intereses partidstas", á vez que afirmou que a investidura de Jácome é froito do "bloqueo permanente deste últimos catro anos" nos que o goberno local non puido sacar adiante ningún dos orzamentos municipais.

"Se fose unha oposición construtiva e desen o apoio aos orzamentos e ás necesidades básicas dos veciños, isto non pasaría", subliñou.

Así mesmo, negou que tanto el como o seu partido a nivel local sexan unha "moeda de cambio" para manter a Baltar na Deputación. "É necesario un goberno que poida agora proceder a dar solucións aos problemas da cidade? Si. Sería unha alternativa mellor un goberno en minoría? Penso que non", insistiu.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Educación política

O bon que ten isto é que así nas seguintes vai sacar 1 ou 2. O malo é que para Ourense é nefasto. Pero din que os representantes políticos son o reflexo da sociedade que os vota... Mira que estiven en moitas cidades europeas de moitos países europeos e só atopei unha con un nivel de mala educación e incivismo máis alto que o de Ourense: Atenas. E outra que lle empata: Vigo. Síntoo como galego, pero tamén hai outras que son marabillosas como en Europa: Pontevedra e Ferrol. Agora moitos en vez de ladrar o que teñen que facer é reflexionar e mellorar. Por iso que Jácome teña os votos que ten en Ourense é normal.