Os galegos, dos menos deportistas do estado

Chega o verán e, con el, as ganas de facer cousas e, mesmo, de poñerse en forma. Pero os datos reflicten unha dura realidade. Os galegos son dos máis sedentarios e menos deportistas de todo o estado. Así o reflicten os datos do último informe elaborado polo comparador de seguros de saúde Acerto.com que apuntan a unha taxa de sedentarismo do 57%, a pesar de que se incrementa o número de persoas que fan deporte nos meses de verán --até 2 de cada 5 incrementa a frecuencia cando chega esta época do ano--.

Os máis activos durante esta época do ano son os baleares e madrileños, seguidos dos rioxanos. Os estremeños e galegos atópanse no lado oposto da balanza. Outras variables que inflúen son o nivel socioeconómico. Canto máis alto é este, máis exercicio se faie e máis diñeiro se gasta en equipamento deportivo -a media española rolda os 90 euros-. En calquera caso, ao conxunto dos españois gústalles facer exercicio cos seus amigos -fano 2 de cada 5-. Case a mesma proporción opta por facelo en solitario, mentres que o resto alterna ou se vai con algún familiar, compañeiro de traballo ou similar. Aínda que estes son a última opción (só o 4% fai deporte con compañeiros de estudo ou traballo).

En canto ás modalidades deportivas, triunfan o ximnasio e o running. Na ecuación e por orde de preferencia entran o fútbol, a natación, o pádel e o ciclismo. Aínda que aquí hai diferenzas entre homes e mulleres. Por exemplo, elas senten moitísima máis preferencia polo ximnasio que eles.

E QUE HAI DETRÁS DO AUMENTO DO DEPORTE NO VERÁN?

E a que responde este aumento na frecuencia do deporte?... "Non ten tanto que ver con que os días acrecentan e apetece máis facer exercicio ao aire libre, senón con razóns estéticas e coa operación bikini tardía". Así o recoñecen até 3 de cada 5 enquisados polo comparador que, lonxe de mellorar o seu estado físico, o que queren é “presumir de bo tipo ou do cachas que están”.

Séguenlle aqueles que din querer estar máis sans e os que desexan adelgazar. O resto alega outros argumentos como divertirse, coñecer xente nova, etcétera. “Dada a relevancia da parte estética non nos estrañan entón outros datos que desvela o informe, como que son moitos os que se poñen a réxime a última hora e máis os que optan por unha dieta milagre -nestas últimas cren até o 64% dos españois-”, recolle nun comunicado.