A Xunta: "Galicia destaca en España pola nosa capacidade para reter talentos"

O Grupo Parlamentario dos socialistas galegos reprochou este venres á Xunta que Galicia "só" represente o 3,6% do gasto español en I+D+i, a pesar de que a Comunidade achega o 6% da poboación nacional e o 5% do Produto Interior Bruto (PIB).

Así o evidenciou na Comisión 3ª de Economía, Facenda e Orzamentos a deputada socialista Matilde Begoña Rodríguez Rumbo, quen lamentou que o Goberno galego "utilice a desvalorización salarial" como modelo para "incrementar a competitividade". "É verdade que estamos á cabeza do gasto público en universidades, e temos a man de obra máis cualificada, pero non somos capaces de reter ese talento", insistiu Rodríguez Rumbo.

Tamén a deputada de En Marea, Julia Torregrosa Sañudo insistiu nesta situación, e criticou que o Executivo autonómico planifique pero logo "non execute". "Se non analizamos os resultados, non podemos ter información do que pasa", indicou. Neste sentido, a directora da Axencia Galega da Innovación, Patricia Argerey Vilar, asegurou que a Xunta está a apostar "de maneira extraordinaria" polo I+D+i, polo que puxo de relevo que "a día de hoxe, hai máis técnicos, científicos e intelectuais traballando en Galicia que en toda a serie histórica".

En resposta ás críticas da oposición, Argerey subliñou que Galicia "destaca pola súa capacidade de reter talento", grazas ás condicións de traballo e de vida. "Ademais, na Comunidade hai máis oportunidades de liderado feminino, situándose como a segunda rexión española", indicou.

Segundo os seus datos, extraídos do informe anual de Cotec, desde 2009 creceu máis dun 22% o persoal dedicado a I+D en empresas galegas. Así mesmo, o aumento interanual deste gasto en 2017 foi "máis do dobre que a media de España e catro veces máis que na Unión Europea".

ORZAMENTOS

A mesma deputada socialista tamén realizou unha pregunta ao director xeral de Planificación e Orzamento, Miguel Corgos, sobre as modificacións nos créditos orzamentarios inicialmente destinados ás corporacións locais de Galicia. Neste sentido, mostrou a súa "inquietude", xa que en tres modificacións movéronse "máis de 390 millóns de euros".

Ademais, expresou o seu desexo de que "non se perda ningún recurso local", e criticou "a forma de gobernar" da Xunta, porque "debería ter unhas condicións de igualdade", xa que, ao seu xuízo, aposta máis por investir en concellos onde goberna o PP.