Ribadavia terá un museo monográfico sobre o viño de Galicia
Estará na casa reitoral de Santo André de Camporredondo, un edificio do século XVIII que ten un miradoiro sobre o Avia e o Miño
Por Europa Press / Redacción | Ribadavia | 27/06/2019 | Actualizada ás 19:41
O municipio ourensán de Ribadavia contará co Museo do Viño de Galicia (MVG), un centro situado en "o corazón do Ribeiro" que pretende "recuperar, conservar e difundir o patrimonio cultural" do sector do viño.
A creación do Museo do Viño de Galicia foi adoptada este xoves polo Goberno galego durante a reunión do executivo, que anunciou o pasado mes de maior o inicio da tramitación do anteproxecto da primeira lei galega de museos.
Encadrada nos obxectivos de apostar pola conformación dunha rede de museos que pivote sobre as dimensións "social, investigadora, pedagóxica e económica"; o Museo do Viño de Galicia pretende "reflectir o fenómeno histórico, paisaxístico e social" ligado ao viño na historia do país.
De acceso gratuíto, situarase na casa reitoral de Santo André de Camporredondo, cedida pola Diócese de Ourense á Xunta. Trátase dun inmoble do século XVIII localizado en plena comarca do Ribeiro que conta cun miradoiro sobre as terras dos ríos Avia e Miño.
A casa reitoral foi rehabilitada e equipada a través dun investimento de case dous millóns de euros achegados polo Goberno galego. O complexo ten parcelas nas que poderían incorporarse cultivos con viñas musealizadas para a súa investigación.
O Museo do Viño dependerá da Consellería de Cultura e Turismo e estará dirixido polo Museo Etnolóxico de Ribadavia. A Xunta financiará o seu desenvolvemento con 300.000 euros anuais e está prevista a creación de tres postos de traballo.
