A proposta da Xunta para calar á enfermaría: ofrece contratos de tres anos a cen profesionais
Feijóo recoñece a existencia de contratos excesivos.“O obxectivo é garantir a súa estabilidade laboral e reducir o número de contratatos excesivos”, indicou.
Por Xurxo Salgado | Santiago de Compostela | 04/07/2019 | Actualizada ás 14:54
A Xunta quere calar os profesionais sanitarios anunciando semana tras semana novas ofertas de contratos. A última é ao colectivo de enfermaría tras as continuas protestas e o último Manifesto pola fin da Precariedade na Enfermaría do colectivo Enfermeiras Eventuais en Loita. A proposta de Alberto Núñez Feijóo para tentar calmar os ánimos deste sector pasa por ofrecer contratos de tres anos aos profesionais eventuais.
“Agardamos que sobre cen enfermeiros se poidan acoller a este contrato de estabilización”, anunciou o presidente da Xunta na rolda de prensa posterior ao Consello. Así, destacou que isto servirá para que estean máis estables antes de sacar unha praza definitiva.
Feijóo destacou que o seu goberno leva meses tentando estabilizar a situación laboral dos profesionais da sanidade. Así, lembrou que xa se contrataron a 30 médicos e pediatras nas últimas semanas e que “agora tócalle aos enfermeiros”.
BUSCA A “ESTABILIZACIÓN”
Por iso, anunciou esta nova medida de “estabilización” que afectará ás profesionais que traballen en calquera centro sanitario; hospitais, urxencias, centros de saúde ou puntos de atención continuada. “O obxectivo é garantir a súa estabilidade laboral e reducir o número de contratatos excesivos”, indicou.
Os profesionais que accedan a estes contratos, suliñou o presidente galego, terán “os mesmos beneficios no réxime de descansos que o persoal estable”. Esta medida, lembrou, súmase a intención do seu executivo de “mellorar” a situación laboral do sector. “Na convocatoria 2013-2019 xa se sacaron 1.519 prazas e no último concurso de traslados un total de 1.841 profesionais cambiaron de destino”, salientou.
CRÍTICAS
Este anuncio chega logo de que os profesionais presentaran o Manifesto pola fin da Precariedade na Enfermaría Galega, un documento no que denuncian duramente a precariedade laboral á que se ven sometidas. Así, critican que a Xunta ten “escravizadas e sen dereitos” a miles de profesionais cualificadas que non contan con contratos estables e ás que poden recorrer “a calquera hora do día”, dado que “se non, non comen”.
