Baixa un 58% a sinistralidade viaria en xuño en Galicia

A sinistralidade viaria descendeu en xuño en Galicia, ao pecharse o pasado mes con cinco falecidos en cinco accidentes de tráfico, fronte ás 12 vítimas mortais en 11 sinistros no mesmo período de 2018.

Deste xeito, segundo os datos facilitados este luns pola Dirección Xeral de Tráfico (DXT), o número de mortos na rede viaria galega descendeu en xuño un 58,3 por cento, mentres que o de sinistros caeu un 54,5%.

Por provincias, en xuño a da Coruña rexistrou dous falecidos en dous accidentes, fronte ao cinco mortos en catro sinistros no mesmo mes de 2018; mentres que na de Lugo houbo dúas vítimas en dous incidentes, fronte ao catro falecidos en catro sinistros do exercicio anterior.

Mentres, na provincia de Pontevedra morreu unha persoa nun sinistro, igual cifra que en 2018; e na Ourense non houbo vítimas mortais no mes de xuño, fronte aos dous falecidos no mesmo período do ano pasado. Dos cinco accidentes de tráfico contabilizados en xuño nas estradas de Galicia, catro debéronse a colisións e un correspondeu a unha saída de vía.

Por idades, dúas das persoas falecidas en sinistros en Galicia situábanse entre os 25 e 44 anos; outra, entre os 45 e 54; outra, entre os 55 e 64; e outra das falecidas era maior de 65 anos.

SEMESTRE

No primeiro semestre faleceron 47 persoas en 44 accidentes de tráfico na rede viaria galega, fronte ás 39 vítimas en 38 sinistros no seis primeiros meses de 2018, o que supón un 20,5% máis de mortos e un 15,8% máis de incidentes.

Do total de falecidos entre xaneiro e xuño, 21 vítimas corresponderon á provincia da Coruña --unha máis que no mesmo período de 2018--; 14, á de Pontevedra --fronte ás 5 do ano pasado--; sete, en Lugo --a mesma cifra--; e cinco, á de Ourense --dúas menos--.

Estado no que quedou o vehículo que sufriu o accidente na mañá deste domingo na Pobra do Caramiñal (A Coruña). GARDA CIVIL DE TRÁFICO | Fonte: Europa Press