O BNG de Santiago critica que o Xacobeo eclipes temas "vitais" para a cidade na reunión entre Feijóo e Bugallo

A portavoz do grupo municipal do BNG en Santiago, Goretti Sanmartín, cualificou de "pouco ambiciosa" a reunión mantida este luns entre o presidente da Xunta, Alberto Núñez Feijóo, e o alcalde da capital galega, Xosé Sánchez Bugallo, e lamentou que o Xacobeo "opacase prioridades de vital importancia" para os veciños.

Así o manifestou nun comunicado remitido aos medios, no que lembra a necesidade de revisar a asignación económica da Xunta no marco do Estatuto da Capitalidade "moi lonxe dos 5,5 millóns que estimaba o profesor César Caramés no seu estudo", posto que nos orzamentos dos dous últimos exercicios a cifra "non supera os 2,5 millóns".

"Santiago de Compostela debe recuperar peso político como capital do país e, para iso, tamén é necesario que consiga o financiamento que lle corresponde polos custos que teñen en exencións tributarias de edificios, de impostos de vehículos, vaos, seguridade, rehabilitación do patrimonio e limpeza, entre outras cuestións", indicou.

Ademais, entre outras cuestións, para o BNG, nesa reunión Bugallo tamén lle debería reclamar ao presidente a ampliación da Escola Oficial de Idiomas e do Conservatorio Profesional de Música e a creación novas escolas infantís ante a demanda de prazas existentes.

Así mesmo, no plano da protección ambiental, reclama a consignación para a nova estación depuradora e incluír nas presupostos obras para o saneamento e abastecemento no rural, xunto coa axilización da concentración parcelaria de Villestro e Figueiras.

A nacionalista tamén considerou que deberían figurar na axenda a "negativa" do Concello de Santiago ao anuncio por parte do Sergas de "pechar 140 camas no Complexo Hospitalario Universitario de Santiago (CHUS) e sete dos 15 quirófanos durante o verán, entre outras cuestións".

A concelleira do BNG Goretti Sanmartín