Por Europa Press / Redacción | SANTIAGO DE COMPOSTELA | 15/07/2019 | Actualizada ás 18:24
O deputado de Galicia en Común e secretario xeral de Podemos Galicia, Antón Gómez-Reino, criticou que o Partido Socialista pretenda copar "o 100% do executivo" cando "só" conta co "28% do poder lexislativo".
Gómez-Reino mostrou a súa "perplexidade" polas declaracións na Cadena Ser do presidente do Goberno en funcións, Pedro Sánchez, nas que cualificou de "mascarada" a consulta ás bases de Podemos sobre a investidura e deu por rotas as negociacións cos morados.
"Non hai máis mascarada que levar meses gobernando con 84 deputados grazas ao sentido de Estado, humildade e responsabilidade doutras forzas políticas", espetou o parlamentario, que tamén considera unha "mascarada" que o PSOE "se presente en campaña como progresista e despois faga o contrario" ou que "se presente como muro de contención do 'trifachito' e despois faga chamados ao PP e Ciudadanos" para que faciliten a investidura de Sánchez como presidente.
Tras afirmar que "a man" de Unidas Podemos "está tendida" para alcanzar un acordo, insistiu en que "a aritmética e a expresión" dos cidadáns nas eleccións do 28 de abril "foi clara", polo que afea ao PSOE que "co 28% do lexislativo queira ter o 100% do executivo".
"É inverosímil democraticamente", engadiu, para a continuación censurar que Pedro Sánchez "se inhiba da responsabilidade que lle outorgou o xefe de Estado" para a formación de goberno. "Estamos a esperar que se digne a convocar os equipos para a negociación integral do goberno", apostilou.
DEFENDE A CONSULTA ÁS BASES
O secretario xeral de Podemos Galicia defendeu a consulta ás bases organizada polo partido morado sobre a postura a tomar na investidura do candidato socialista, Pedro Sánchez, quen afirmou este luns que o proceso estaba "trucado" para "xustificar unha votación contraria".
Así, o deputado galego destacou que a consulta "é un exercicio democrático", á vez que afeou que "partidos que copiaron este tipo de formato" agora "critiquen que se faga".
Así mesmo, afirma que a consulta "ten toda a validez", aínda que o Grupo Confederal de Unidas Podemos non está exclusivamente formado polo partido morado, xa que tamén participan nel outras formacións como Esquerda Unida e as súas federacións ou Equo.
Neste sentido, Gómez-Reino apunta que o resto de organizacións conta cos seus órganos de decisión e participación "lexítimos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.