Aumentan preocupantemente os varamentos de cetáceos en Galicia

A Coordinadora para o Estudo dos Mamíferos Mariños (CEMMA) alerta dun preocupante aumento no ritmo de varamentos de cetáceos que se producen na costa galega: "O total de cetáceos atendidos no primeiro semestre chegou a 180 (media de 1 diario), o máis alto dos últimos anos". 

Como recorda a Cemma, o normal é que "no primeiro trimestre do ano é cando se producen máis varamentos en Galicia, condicionado en xeral polas borrascas e ventos do suroeste que predominan aquí nesa época, e que despois aínda que se manteñen constantes ao longo do ano, xa o son en números inferiores".

Porén, este ano os científicos detectaron que "ese ritmo tan alto non baixou na primavera, e tivemos uns meses de abril e xuño que superan moito ás medias da última década".

A Cemma aporta un gráfico coa evolución dos varamenros en Galicia no primeiro semestre de cada ano, desde 2015. A gráfica fala por si soa: ano tras ano, estes eventos foron aumentando, de menos de 50 en 2015, a 180 en 2019 (o cuádruple).