Por Europa Press / Redacción | SANTIAGO DE COMPOSTELA | 07/08/2019 | Actualizada ás 14:39
Os autores Alberto Vázquez e Martín Romero foron os gañadores do Premio Castelao de Banda Deseñada, certame da Deputación coruñesa que xa chegou á súa XIV edición.
O gañador de tres Premios Goya por obras como 'Birdboy', 'Psiconautas' ou 'Decorado', Alberto Vázquez, sitúase como un dos autores máis recoñecidos do panorama galego, e as súas pezas chegaron a prestixiosos festivais de todo o mundo como Cannes, EFA Award, Toronto ou Slamdance.
Vázquez resultou galardoado na categoría xeral do certame pola peza 'A Caza', unha obra na que destaca o "sólido" grafismo utilizado, coa técnica do sumi-e e tinta chinesa, ademais do "debuxo expresivo" co que xera unha unidade narrativa e "un mundo propio e persoal".
Doutra banda, o xurado decidiu recoñecer a obra 'Uxío' de Martín Romero na categoría infantil e xuvenil, da que se resalta que explota as "posibilidades narrativas" do medio e o uso "humorístico, divertido e adaptado á idade" dunha filosofía sobre a vida e o cotián.
Romero é ilustrador, autor de cómics e director de animación, con obras como 'As fabulosas crónicas do rato taciturno', 'A débeda' e 'A Noite', a súa primeira curtametraxe de animación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.