Por Europa Press / Redacción | SANTIAGO DE COMPOSTELA | 21/08/2019 | Actualizada ás 17:16
A Xunta prevé mobilizar 65 millóns de euros co seu programa de axudas para actuacións de eficiencia enerxética en pemes (pequenas e medianas empresas) e grandes compañías do sector industrial. Estas axudas, segundo explicou o director xeral de Enexía, Anxo Bernardo Tahoces, permitirán "apoiar a 200 iniciativas" e crear "ata 900 postos de traballo" coa finalidade de "incentivar medidas para aforrar consumo enerxético e evitar emisións de CO2".
A iniciativa está enmarcada no programa estatal de axudas de eficiencia enerxética cun orzamento de 16 millóns de euros, que Tahoces considerou "unha asignación xusta", a cal permitirá levar a cabo "actuacións que contribuirán á competitividade do sector industrial galego".
Os interesados, explicou a Dirección Xeral de Enerxía e Minas, poderán presentar proxectos para "a implantación de sistemas de xestión enerxética" e para a mellora tecnolóxica dos equipos das empresas solicitantes. Cada proxecto ten unha dotación máxima de 1 millón de euros que "pode chegar a 2", cunha axuda máxima por empresa de 5 millóns de euros e "unha posibilidade de anticipo de ata o 50%", apuntou o Executivo autonómico.
OBXECTIVOS
Entre os obxectivos marcados pola Xunta no marco destas axudas á eficiencia enerxética, o Goberno galego sinalou reducir a factura das empresas en 7,28 millóns ao ano e un aforro enerxético de 8.090 toneladas de petróleo, "o que equivale a 1,25 millóns de árbores", apuntou.
A Unión Europea (UE) fixou un obxectivo de eficiencia enerxética do 32,5% para 2030 e Tohaces asegurou que en Galicia, en 2017, conseguiuse un 23,5% de aforro enerxético. Neste sentido, a UE establece un incremento anual de 0,2% e, a Xunta sinalou que "Galicia está a ter un incremento por ano de 1,8%". O director xeral sinalou que quedan "trece anos para conseguir os obxectivos marcados" e que Galicia "superará con fartura" os obxectivos marcados pola UE.
BALANCE
Por outra banda, Tahoces presentou este mércores un balance das axudas concedidas desde 2013 e proxectos subvencionados. Segundo datos do Goberno autonómico, foron subvencionados 1.182 proxectos de aforro enerxético e concedeu 29,7 millóns en axudas. A Xunta considerou o balance como "sumamente importante" e espera, pola súa banda, que nesta nova convocatoria póidanse "abordar proxectos de grande envergadura".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.