Verea toma o mando do PP de Santiago co reto de "ampliar equipos"

O presidente da xestora do PP de Santiago, Borja Verea, situou como o seu reto "prioritario e urxente" a "ampliación de equipos" na formación. "Xuntos sumamos máis, quero contar con todos os que teñan ganas de traballar", sinalou, antes de chamar a traballar unidos ante a proximidade de dúas novas citas coas urnas: as xerais do 10 de novembro e as autonómicas do ano que vén.

En rolda de prensa, Verea admitiu que asume a encomenda de presidir a xestora "con todo o respecto" e que se puxo como obriga a de "escoitar moito" e tratar de "ampliar equipos" para dotar ao PP de Santiago de "unha estrutura áxil e eficaz" que sirva tanto para facer fronte a retos electorais como para ser correa de transmisión do grupo municipal.

"O PP de Santiago quere ser espazo de encontro de simpatizantes e militantes, un lugar para a participación, para trasladar inquietudes e que estas sexan valoradas e tidas en conta", remarcou, antes de advertir que "veñen meses de moita tensión electoral", coas xerais e as autonómicas, polo que "o urxente é agora concentrar enerxía".

Pendente de reunirse co portavoz municipal dos populares, Alejandro Sánchez-Brunete, aínda que xa falou con el, manifestou o seu desexo de que o grupo sexa "a bandeira do partido" e de que todos os concelleiros teñan "moito protagonismo" como representantes non só do partido, senón dos composteláns.

O CONGRESO, TRAS AS AUTONÓMICAS

Verea chamou a "concentrar enerxías" ante as próximas citas electorais e incidiu en que será despois das autonómicas cando o partido local celebrará "un bo congreso, participativo e transparente" que permita consolidar unha nova dirección.

Acerca de se se ve el liderando a agrupación, replicou que a "encomenda" que asumiu de estar á fronte da xestora cínguese ás dúas próximas citas electorais. O seu obxectivo é tratar de "mellorar os resultados na cidade" e "non" se expón neste momento a idea de presentarse ao congreso.