O Valedor tramitou en 2018 case un 30% menos de expedientes de queixa ca no ano anterior

O Valedor do Pobo realizou durante o ano 2018 un total de 24.771 actuacións --cunha media mensual de 2.063-- e tramitou 20.807 expedientes de queixa, un 29% menos que no anterior exercicio (cando o total de expedientes situouse en 29.365). O foco, como é habitual, estivo nos servizos públicos, sobre todo en sanidade e educación.

Á fronte da institución, María Dolores Fernández Galiño, tras entregar o informe ao presidente do Parlamento, Miguel Santalices, foi a encargada de presentar o informe do pasado exercicio, aínda que lembrou que non corresponde á súa xestión na institución, posto que ocupou o cargo hai dous meses tras a saída de Milagros Otero, quen se viu envolvida nunha polémica por un nomeamento.

En concreto, a saída de Otero produciuse uns meses despois de que o Tribunal Supremo ratificase a nulidade do nomeamento do posto de xefe de servizo de Administración e Persoal, por "desvío de poder", a María Puy Fraga, sobriña do expresidente Manuel Fraga e irmá do portavoz parlamentario do PPdeG.

Nesta conxuntura e acompañada do seu equipo, Fernández Galiño mostrouse prudente e evitou profundar nas valoracións a pesar das preguntas dos medios, aos que remitiu ao contido estrito da memoria. Si remarcou que é lóxico que sanidade e educación rexistren o maior número de queixas ao ser os servizos con maior cantidade de usuarios.

Tamén resaltou que o diálogo e a aceptación das recomendacións por parte das administracións, tanto no ámbito autonómico como no local --segundo o que permiten os recursos dos municipios, máis reducidos-- é positiva; e destacou que hai anos que non é preciso facer "unha declaración de hostilidade". "Creo que desde 2006", apostilou.

SANIDADE, URBANISMO E EDUCACIÓN

Os asuntos sobre os que se queixan os galegos non ofrecen grandes novidades en relación a exercicios previos. Así, as áreas que concentran un maior número de reclamantes ou queixas foron as de sanidade, con 8.437 (40,55%); urbanismo, con 3.512 (16,88%); e educación, con 2.390 (11,49%). Tamén hai queixas numerosas noutras áreas como servizos sociais e medio ambiente, así como obras públicas e expropiacións.

En total, o 86,77% das queixas incumbe á Administración autonómica (19.456), fronte ao 12,40% dos concellos (2.782), un 0,69% (154) ás deputacións provinciais e un 0,14% (31) ás universidades galegas.

Por Consellerías, as que aglutinan máis queixas son as de Sanidade --con moita diferenza con respecto ao resto--, Medio Ambiente, Educación, Infraestruturas e Vivenda e Política Social.

Se a distribución faise por número de asuntos, as que encabezan o ranking son novamente Sanidade e Política Social.