Alertan do "perigo de caída de bloques de xeo" dos muíños do parque eólico Mouriños

A asociación Salvemos Cabana alerta do "perigo de caída de bloques de xeo" na contorna dos aeroxeradores do parque eólico Mouriños, situado entre os municipios coruñeses de Cabana de Bergantiños e Zas.

A plataforma explica que o xeo se pode formar "de diferentes maneiras" en función "das condicións meteorolóxicas e da velocidade de xiro das turbinas", ao que se suma o aire húmido do mar como "un factor determinante".

Para o colectivo, esta situación representa "unha ameaza real" para veciños e sendeiristas, posto que "limita claramente os usos do chan" na Serra do Gontón, especialmente nas épocas frías do ano.

Ademais, Salvemos Cabana sinala que unha potencial avaría dos rotores dos muíños pode provocar que algunhas das súas pezas "se desprendan", o que supón "un risco para a seguridade pública, máis cando non se contemplou sobre o terreo unha distancia mínima de seguridade".

A iso hai que sumar, segundo denuncia a asociación, que os aeroxeradores deste parque se atopan nos puntos elevados da serra e son un "foco de atracción" de descargas eléctricas en tempos treboentos.