Comeza a tramitación da lei que busca reducir en tres anos as fugas de auga a menos do 20%

A futura lei de medidas de garantía de abastecemento, que busca reducir en tres anos as fugas de auga a menos do 20% --as perdas nalgunhas redes municipais alcanzan o 40%--, seguirá a súa tramitación parlamentaria tras superar o debate de totalidade.

Común da Esquerda, BNG e En Marea presentaron senllas emendas de devolución que non saíron adiante ao ser rexeitadas polos populares, mentres o PSdeG abstívose.

No pleno da Cámara, a conselleira de Infraestruturas, Ethel Vázquez, explicou que con esta norma "pioneira" combateranse as fugas, pois Galicia é a cuarta comunidade con máis perdas, con máis de 55.000 millóns de litros ao ano. Ademais, establecerá protocolos de actuación en períodos de seca ou por risco sanitario.

De tal forma, fíxase un cronograma polo cal os municipios terán dous anos para facer auditorías das súas redes de abastecemento e localizar fugas. Tras iso, contarán cun ano máis para executar as obras. Despois dese período de tres anos, aplicarase un gravame disuasorio que penalizará as perdas excesivas de auga cuxa recadación irá, en exclusiva, á renovación das redes.

Así, a conselleira sinalou que as competencias no abastecemento de auga á poboación son dos concellos, aos que mostra a colaboración da Xunta, pero demanda que as deputacións "se impliquen".

CONTADORES E PLANS CONTRA A SECA

O próximo ano poranse en marcha axudas para a instalación de contadores de caudal, que serán obrigatorios nos puntos de captación e de subministración final para ofrecer información acerca de fugas.

Así mesmo, o proxecto de lei concede un prazo de dous anos desde a súa entrada en vigor para que os municipios con máis de 20.000 habitantes -para os de menos é recomendable e non obrigatorio-- elaboren plans de emerxencia fronte á seca. Na actualidade non hai ningún concello que conte con este plan, aínda que a convocatoria de axudas recentemente impulsada pola Xunta rexistrou 80 solicitudes.

Tamén se autorizará aos concellos a realizar expropiacións de terreos ou outras infraestruturas necesarias para cometer obras de urxencia en períodos de seca. Todo iso para "aforrar auga, enerxía e diñeiro aos cidadáns", así como co obxectivo de "blindar a Galicia fronte aos desafíos do cambio climático".

"BOTAR BALÓNS FÓRA" AOS CONCELLOS

Pola súa banda, Marcos Cal (Grupo Común da Esquerda) censurou que este é un proxecto de lei baseado na "privatización" e "o formigón", cunha estratexia "anticuada, ineficaz, irresponsable e insensata". Pide que "deixen de botar balóns fóra" e de "cargar aos municipios as consecuencias do seu modelo privatizador".

Nesta liña, Luís Bará (BNG) afeou a Ethel Vázquez que é a "principal" responsable da auga en Galicia desde 2009 "e agora a culpa é do chachachá" e "os concellos". Recrimina que a lei supón a "constatación dun fracaso das políticas do PP nestes 10 anos", pois "despois de 10 anos de desidia" agora queren "botarlle a pataca quente aos concellos".

O nacionalista reprocha que aínda se está "esperando" a promesa de 2013 da Xunta de que "nun ano" se ía pactar un recibo único da auga. Cuestiona "cando van facer" o plan xeral de abastecemento que depende da Xunta, con "500.000 euros consignados", pois "queren que os concellos fagan os plans de emerxencia, pero vostedes non fixeron os criterios xerais".

Davide Rodríguez (Grupo Mixto) identifica "fallos de fondo moi potentes" na nova lei, cunha falta de participación e "coqueteos coa privatización", ademais "dunha carga máis para os concellos" e "sancións". Reprocha que "a última estocada" é a de reducir os caudais dos ríos para "beneficiar" as eléctricas.

En cambio, o deputado socialista Luís Álvarez explicou que o seu grupo non presentou emenda de devolución, xa que considera que é unha lei "necesaria", aínda que observa que é un "proxecto mellorable".

Así mesmo, Álvarez censurou a falta de implementación do pacto local da auga desde a firma dun protocolo en novembro de 2013. A continuación, mostrou o seu "estupor absoluto" ao comprobar que Augas de Galicia deixou sen executar "111 millóns" no últimos tres anos.

LEA ENTRE TRENOR E CAL

O deputado popular Gonzalo Trenor agradeceu que o PSOE non presentase emenda á totalidade, á vez que defendeu que a futura lei "non ten finalidade de sancionar nin establecer mecanismo punitivo ningún".

En cambio, o popular censurou a exposición do resto dos grupos, en especial cargou contra Marcos Cal, ao que acusou de "plaxio" dos argumentos expostos polo profesor Arrojo "hai 25 anos" en Zaragoza contra o transvasamento do Ebro.

Na súa réplica, Cal xustificou que na súa emenda á totalidade, "evidentemente", hai partes do profesor Arrojo porque "asesorou" ao grupo para facer este traballo. "Esa é a diferenza", dixo, pois asegura que en Común da Esquerda válense de "eminencias" e "vostedes do primo de Rajoy". "Siga vostede facendo o ridículo", espetou ao popular.

Pleno Parlamento de Galicia