Traballadores e Concello das Pontes chaman aos veciños a ir a Madrid para reclamar a continuidade da central
Fretarán autobuses para a concentración ante o Congreso, á que se sumarán os colectivos doutras centrais de Endesa en España.
Por Europa Press / Redacción | As Pontes | 10/10/2019 | Actualizada ás 19:55
Os traballadores da central de Endesa nas Pontes e das súas auxiliares e o goberno local animaron aos veciños da localidade e os municipios da comarca de Ferrolterra a viaxar a Madrid o próximo 16 de outubro para participar na concentración ante o Congreso en defensa da continuidade da térmica.
Ese mesmo día está convocada unha folga xeral no Concello das Pontes para protestar contra a paralización e posible peche definitivo da central de Endesa no municipio, ademais de para facilitar o desprazamento dos veciños que queiran sumarse á protesta.
Para iso, o Concello fretará autobuses que partirán desde a estación da localidade o mércores 16 ás 09,00 horas. Para ter praza no autocar é necesario apuntarse no rexistro municipal.
A concentración ante o Congreso atrasarase ás 16,00 horas debido a que, esa mesma mañá, está prevista outra mobilización ás portas das Cortes. Así mesmo, o goberno local solicitou manter reunións con todos os grupos con presenza no Congreso.
Ademais, os traballadores e veciños das Pontes estarán apoiados por colectivos procedentes de Ponferrada, Carboeiras e Andorra, lugares onde tamén periga a continuidade das súas respectivas plantas térmicas.
