A Real Academia Galega entrega os premios 'Primavera das Letras'
O concurso dá a coñecer como celebrou o Día das Letras o alumnado de menor idade e premia a implicación dos colexios na divulgación da lingua e a cultura galegas.
- Víctor Freixanes: "A elección de Carvalho Calero é unha cuestión de xustiza histórica"
- A Real Academia Galega trae unha nova 'Primavera das Letras'
Por E.P. | SANTIAGO DE COMPOSTELA | 15/10/2019 | Actualizada ás 10:17
A Real Academia Galega entregará este martes, a partir das 12,00 horas, os premios 'Contádenos o voso Día das Letras' aos tres centros gañadores: o CEIP de San Roque de Darbo, en Cangas; o de Ponche do Porto, en Camariñas; e o CPI de Bembibre, en Val do Dubra.
A académica Fina Casalderrey será a encargada de conducir o acto, no que tamén participarán Avelino Martínez, sobriño de Antonio Fraguas, e representantes de Xerais, Galaxia, Bolanda e Kalandraka, as catro editoriais que colaboran na dotación dos premios.
Este concurso forma parte do proxecto 'Primavera das Letras', co que a Real Academia Galega fornece a comunidade educativa de infantil e primaria de material lúdico e didáctico ao redor da vida e obra da figura recoñecida cada 17 de maio.
O concurso pretende dar a coñecer como celebrou o Día das Letras o alumnado de menor idade e premiar a implicación dos colexios na divulgación da lingua e a cultura galegas. Nesta edición participaron máis de 80 centros.
