Abre o prazo de achegas á lei que permita a creación dunha empresa pública que xestione o ciclo da auga
A empresa será cento por cento pública e a adhesión será voluntaria para os concellos nos servizos que soliciten.
Por Europa Press / Redacción | SANTIAGO DE COMPOSTELA | 16/10/2019 | Actualizada ás 17:21
A Xunta abre o prazo para facer achegas ao anteproxecto de lei que creará unha empresa pública para xestionar o ciclo completo da auga, nun período de información pública ata o 5 de novembro.
O Goberno galego arrincou a pasada semana a tramitación deste anteproxecto que busca unha xestión profesional do ciclo completo da auga, co obxectivo de axudar aos municipios no abastecemento e saneamento, así como abaratar os custos.
A empresa será cento por cento pública e a adhesión será voluntaria para os concellos nos servizos que soliciten. A Xunta terá a maioría do capital, mentres os municipios e as deputacións decidirán se se adhiren ou non. Así mesmo, busca establecer tarifas unitarias para todos os concellos de Galicia por cada metro cúbico de auga depurada ou abastecida.
