Veciños de Teo convocan unha manifestación para este domingo contra as obras na canteira de Casalonga

Casalonga Limpa de Residuos convoca unha manifestación para este domingo 27 de outubro ás 11 da mañá na vella canteira de Casalonga. Queren protestar así contra o baleirado da lagoa que se creou nos terreos da antiga explotación de áridos. Dita superficie lacustre está sendo baleirada por maquinaria pesada desviando a súa auga cara os ríos Sar e Ulla a través do rego Francos.

Segundo teñen manifestado desde a plataforma veciñal convocante da manifestación, as augas baleiradas trasladarán aos ríos especies invasoras, como carpas e as sementes de herba da pampa, entre outras, o que provocaría a proliferación nos ríos e nas súas contornas, destes especimes invasores.

Por outra banda, a plataforma indica que a actual actividade “só serve de engano para logo encher os buratos de resíduos e convertilo nun vertedoiro. Un negocio redondo e indigno contra o que a veciñanza xa leva máis dun ano loitando”. Xunto a isto, tamén denuncian que “Augas de Galicia non está a facer o seu traballo” pois “a Plataforma está a presentar unha denuncia a Augas de Galicia por ter autorizado o baleirado da lagoa baseado nun estudo feito fai máis dunha década, cando aínda non existía a lagoa como tal”.

Ademais acusan á Dirección Xeral de Minas de responder “co silencio á nosa solicitude de paralización cautelar da actividade”. Os motivos que alegan para parar o baleirado son que “existe un expediente aberto por caducidade da actividade mineira que se agrava coas numerosas infraccións cometidas estes días por parte da empresa”. A isto súmanlle que o plan de restauración presentado “ten máis de mil alegacións pendentes de contestación”.