O sector pesqueiro da Coruña en contra do sistema de cotas da CE

O presidente da Lonxa da Coruña, Juan Carlos Corrás, cualificou de "preocupante" a proposta da Comisión Europea (CE) sobre os Totais Admisibles de Capturas (TAC) e cotas pesqueiras para 2020, pola "dependencia" de Galicia de moitas das especies afectadas. Aos problemas vinculados co Brexit, apuntou tamén a esta proposta, con "restricións sobre a pescada e o xurelo". "E o lagostino durante tres anos queren que continúe pechada", dixo.

"Aquí téñennos para pelexar e reclamar esa posición que deben ter as pesqueiras españolas", dixo en referencia ás administracións e en relación a unha formulación da Comisión Europea que vinculou con "un intento dos países do norte de debilitar o noso poder comercial".

O presidente da Lonxa da Coruña realizou estas declaracións tras unha reunión coa conselleira do Mar, Rosa Quintana, e cos candidatos do PP ao Congreso e ao Senado, Valentina Martínez e Miguel Lorenzo, respectivamente, ademais da presidenta do PP local, Beatriz Mato.

Neste encontro, a conselleira do Mar apelou a que todos os países comunitarios vinculados coa pesca fagan "os esforzos que se fixeron desde Galicia".

"A maior parte dos recursos que explotamos témolos en rendemento maximo sustentable, adaptámonos a todas as normas da UE", sinalou en referencia a unha pesca concibida desde a vertente social, ambiental e económica. "Pedimos a todos os que teñen que tomar decisións que teñan en conta este tres elementos", recalcou.