O futuro de Navantia en Ferrol é "prometedor e moi optimista", di o presidente da empresa pública
Ricardo Domínguez subliña a creación de 5.000 empregos actuais e prevé alcanzar os 9.000 coas F-110.
Por Europa Press / Redacción | Ferrol | 09/05/2025 | Actualizada ás 17:19
O presidente de Navantia, Ricardo Domínguez, manifestou este venres nas Pontes un presente "moi optimista" para o estaleiro de Ferrol, cunha entrada "cada día de 5.000 persoas" traballando nas súas instalacións, "unha cifra que non se alcanzaba en máis dunha década".
Domínguez realizou estas declaracións na xornada informativa 'Perspectivas empresariais para a próxima década na comarca de Ferrolterra', organizada pola Asociación de Empresarios Seara, na súa sede das Pontes, no polígono de Penapurreira, nun acto no que tamén interveu o alcalde das Pontes, Valentín González Formoso.
O presidente da empresa pertencentes á Sociedade Estatal de Participacións Industriais (SEPI), destacou a situación actual do estaleiro de Ferrol, "cun presente moi optimista e para afrontar un futuro aínda mellor", destacando a actual carga de traballo, impulsada por diferentes programas da Armada Española.
Tamén destacou o importante programa de investimentos en marcha para converter as instalacións nun estaleiro "punta de lanza á vangarda tecnolóxica", capaz de responder as demandas do Ministerio de Defensa e a Armada.
"UN MOMENTO DE OPTIMISMO"
En canto ao futuro, o presidente de Navantia referiuse ao programa das fragatas F-110, que prevé alcanzar "os 9.000 empregos na zona nun prazo de dous anos" e que este incremento de emprego será "de forma sostida", evitando así os ciclos de alta e baixa actividade que historicamente afectaron ao emprego na ría de Ferrol e provocaron a marcha de profesionais a outros sectores.
"Co cal eu creo que é un momento de optimismo, onde a empresa, a vangarda a través do Goberno de España, está a investirse de forma contundente para dar a estabilidade e financiar a economía da ría", concluíu Domínguez, antes de resaltar o compromiso do Goberno central co futuro industrial e económico da comarca de Ferrolterra.
