O pacto co PSOE na Coruña "non pasa polas súas mellores horas" segundo Marea Atlántica
Os concelleiros María García e Iago Martínez confirmaron que os edís de Marea Atlántica votarán a favor das novas ordenanzas fiscais, das que dixeron que están "protagonizadas" por propostas desta formación.
Por E.P. | A CORUÑA | 30/10/2019 | Actualizada ás 19:12
Marea Atlántica advertiu que o seu pacto co PSOE na Coruña, que garantiu a investidura da alcaldesa, Inés Rey, "non pasa polas súas mellores horas", despois de denunciar tamén un intento por parte dos socialistas de "invisibilizar" as súas achegas ás ordenanzas fiscais.
En rolda de prensa, os concelleiros María García e Iago Martínez confirmaron que os edís de Marea Atlántica votarán a favor das novas ordenanzas fiscais, das que dixeron que están "protagonizadas" por propostas desta formación.
Así, atribuíron á mesma modificacións como a bonificación na taxa de lixo para os que instalen, nas súas comunidades, sistemas que lles permitan facerse cargo dos seus propios residuos orgánicos ou a ampliación da "cota cero" na auga, o lixo e o saneamento para persoas sen recursos, xa implantada, segundo expuxeron, durante o seu mandato.
Con todo, reclamaron que se retomen medidas "pendentes", en beneficio de "as maiorías sociais". "Esperamos máis do 'pacto á coruñesa' que asinamos para o inicio do mandato, pero non pasa polas súas melloras horas", asegurou María García, para quen a postura desde a Alcaldía non está a ser "construtiva". En particular, a edil de Marea Atlántica denunciou "falta de interlocución" coa rexedora, Inés Rey, á que reprochou non reunirse cos grupos municipais.
