Gómez-Reino afirma que o apoio a En Común-Unidas Podemos "vale triplo"

O cabeza de lista de En Común-Unidas Podemos pola provincia da Coruña, Antón Gómez-Reino, apelou ao "conxunto do voto progresista" nestas eleccións xerais, incidindo en que o apoio a esta coalición "vale tripla".

"Para impedir que haxa escanos da extremadereita e a dereita, para conseguir un goberno progresista e que Galicia estea por primeira vez no Consello de Ministros", sentenciou.

Fíxoo con motivo dun encontro sobre problemas ambientais con diversos colectivos na cidade herculina e ao que asistiu a eurodeputada María Eugenia Palop.

Sobre este encontro, dixo que o obxectivo é escoitar e trasladar as demandas destes colectivos fronte a un "capitalismo extractivo que está a tentar aproveitar todo o que pode do territorio para sacar beneficios sen reporte ás comunidades humanas", expuxo.