Por E.P. | SANTIAGO DE COMPOSTELA | 11/11/2019 | Actualizada ás 17:11
O director do Instituto Galego de Promoción Económica (Igape), Juan Cividanes, en colaboración da Cámara de Comercio da Coruña, acaba de concluír unha misión comercial a China na que acompañou ás empresas galegas Pescanova, Albo, Lanzal, Estrela Galicia, Vinigalicia, Feiraco-Clun, Leite Río, Galmesano e Coren.
Segundo informa a Xunta, esta delegación participou a pasada semana na Feira Internacional de Importación de Xangai, un evento "de referencia a nivel mundial" no que participaron máis de 2.800 compañías de 170 países, entre as que destacou o sector da alimentación e as bebidas.
Ademais, esta feira celebrou na xornada do pasado mércores o Día de Galicia, de modo que é a única comunidade que contou cun espazo expositivo propio no que se presentaron produtos como conservas de peixe e mariscos, lácteos, carne e bebidas.
Tal e como asegura o Goberno galego, este evento "buscou consolidar as oportunidades de negocio xa abertas no país asiático e crear novas alianzas", ademais de "intensificar a posición dos produtos agroalimentarios no mercado asiático".
E é que, de acordo con datos que manexa a Xunta, China foi en 2018 o segundo destino en Asia das exportacións galegas. Ademais, no oito primeiros meses de 2019 facturaron uns 170 millóns de euros en vendas, o que supón un incremento de máis dun 26 por cento con respecto ao mesmo período do ano anterior. De feito, o xigante asiático é o quinto país de fóra da Unión Europea ao que máis venden as empresas de Galicia.
ESTALEIRO JIANGNAN SHIPYARD
Así mesmo, no marco desta misión, representantes do Igape visitaron o estaleiro Jiangnan Shipyard, en Xangai, onde a compañía de desenvolvemento de proxectos navais Gabadi, de Narón (A Coruña), está a construír catro tanques de contención de gas natural licuado para buques porta-colectores.
Neste sentido, a Xunta destaca que apoiou "activamente" a esta empresa autóctona para conseguir este encargo de fabricación, executado desde o pasado mes de xaneiro por máis de 80 traballadores da entidade galega. Trátase dun equipo formado por uns 65 operarios desprazados e dez técnicos que cooperan en momentos puntuais, ademais doutros especialistas de países como Francia ou Portugal.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.