Por Europa Press / Redacción | SANTIAGO DE COMPOSTELA | 18/11/2019 | Actualizada ás 18:22
O titular do Xulgado do Social número 2 de Ferrol deixou visto para sentenza o xuízo polo que se aborda a demanda presentada por máis de tres cuartas partes dos integrantes da Banda de Música (máis dunha trintena), que reclaman pasar a ser considerados persoal laboral fixo indefinido do Concello. A sesión celebrouse este luns .
"Entendemos que a relación que se establece entre os membros da banda de música e o Concello de Ferrol é unha relación laboral", estimou o seu letrado, Borja Colmenero, que incidiu en que "se encadearon durante anos bolsas fraudulentas" mentres se "encobre" dita relación laboral, algo que tentaron "acreditar".
Pola súa banda, o letrado do Concello de Ferrol estimou que este asunto debería de abordarse no Xulgado do Contencioso-Administrativo", e non no do social, por entender que "non existe vinculación laboral algunha cos integrantes da Banda Ferrolá de Música". "Non concorreron a unha oposición ou concurso, senón que foron seleccionados para poder dispor dunha bolsa e poder formar parte da banda", insistiu.
Tanto a parte demanda como a demandante coincidiron en citar á mesma persoa como testemuña, neste caso o director da Banda Ferrolá de Música, Narciso Pillo, que leva desempeñando este cargo desde o ano 2010.
O director tivo que responder sobre a convocatoria de bolsas, o proceso de selección dos integrantes da banda, as ordes para a realización dos concertos ou se os instrumentos utilizados son de propiedade municipal ou particular, ademais da utilización de espazos propiedade do Concello para realizar os ensaios.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.