372 persoas con discapacidade intelectual presentaronse para 24 prazas de funcionario da Xunta
Por E.P. | SANTIAGO DE COMPOSTELA | 01/12/2019 | Actualizada ás 16:10
Un total de 372 persoas participaron este domingo no proceso selectivo da Xunta reservado especificamente para persoas con discapacidade intelectual, celebrado en Silleda (Pontevedra). Deste xeito, a participación foi do 73 por cento dos inscritos.
Segundo informa o Goberno galego, os participantes neste procedemento "terán máis posibilidades de acceder" a unha praza de emprego público, xa que o número de postos convocados "multiplica por catro o anterior", pasando de seis a 24.
A Xunta lembra que esta oferta, produto dun convenio entre Facenda e representantes de Down Galicia e Fademga, inclúe bolsas de emprego con contratos temporais en postos "especificamente adaptados" ás necesidades destes traballadores con discapacidade.
En concreto, o proceso selectivo consta de dous exercicios. O primeiro --obrigatorio e eliminatorio-- consistiu nun cuestionario tipo test de 45 preguntas: 20 preguntas da parte xeral do programa e 25 preguntas sobre contidos prácticos do traballo a realizar. O segundo exercicio --obrigatorio pero non eliminatorio-- centrouse na contestación por escrito de 10 preguntas tipo test que medirán o seu nivel de coñecemento da lingua galega.
