O profesorado galego, en pé de guerra para esixir a redución do horario lectivo
A campaña de mobilizacións emprendida polos sindicatos docentes desembocará nunha xornada de protestas este xoves, con folga e manifestación.
- Profesores advirten de clases "practicamente incontrolables" e nas que é "imposible impartir docencia"
- O profesorado galego toma as rúas para esixir a redución do horario lectivo
Por E.P. | SANTIAGO DE COMPOSTELA | 11/12/2019 | Actualizada ás 15:34
Os profesores galegos irán á folga este xoves. A campaña de mobilizacións emprendida polos sindicatos docentes desembocará nunha xornada de protestas, na que estas organizacións marcharán de forma unitaria nunha manifestación polas rúas de Santiago de Compostela para reclamar á Xunta a redución do horario lectivo e o regreso á xornada previa aos recortes do sistema educativo.
As mobilizacións están convocadas polos sindicatos da mesa sectorial de Educación (CIG-Ensino, CC.OO. Ensino, FeSP-UGT e ANPE), STEG e CSIF, co obxectivo de esixir ao Goberno galego que dea marcha atrás aos recortes emprendido polo Goberno de Alberto Núñez Feijóo a partir de 2011. Particularmente, reclaman que se anule a ampliación do horario lectivo dos docentes, que supuxo o paso de 21 a 25 horas en primaria e de 18 a 20 en secundaria.
Os sindicatos acusaron á Consellería de Educación de negarse a negociar a devolución desta medida, a pesar de que outras comunidades autónomas do Estado están a recuperar este dereito perdido dos docentes durante a crise económica, cando o Goberno central decidiu impor este horario no territorio de forma similar ao que fixo a Xunta un ano antes.
Así, as organizacións acordaron un calendario de medidas de presión e reivindicativas que culminarán o xoves coa folga nos centros educativos e cunha marcha que sairá da Praza de Cervantes de Santiago ás 12,00 horas.
MIL PROFESORES MENOS
A comitiva percorrerá a Algalia de Arriba e San Roque ata chegar ás dependencias da Consellaría en San Caetano, onde diversos representantes dos sindicatos docentes lerán un manifesto para reclamar a reversión dos recortes.
En concreto, denuncian o empeoramento das condicións de traballo dos docentes tras as medidas dos Gobernos do PP ademais da "desatención" aos alumnos con necesidades especiais, en paralelo aos recortes orzamentarios e a perda de máis de mil postos de profesorado nos corpos de secundaria, entre outras.
A protesta conta co apoio de organizacións do alumnado galego e algunha delas unirase á marcha cunha manifestación propia, ademais dos grupos políticos que conforman a oposición ao Partido Popular.
