Por Europa Press / Redacción | SANTIAGO DE COMPOSTELA | 16/12/2019 | Actualizada ás 16:02
O secretario xeral de Vox, Javier Ortega Smith, recoñeceu este fin de semana que se deles dependen apoiarán a Núñez Feijóo para que siga gobernando en Galicia se o Partido Popular perde a maioría absoluta. Unhas declaracións que ocultan unha realidade dura de dixerir para o Partido Popular; a posibilidade de que dependan desta formación de ultradereita para seguir gobernando en Galicia.
Por iso, o líder do PSdeG, Gonzalo Caballero, aproveitou estas declaracións para atacar duramente a Feijóo e suliñar que ten que vir a "ultradereita" a Galicia para "salvar ao soldado Feijóo" cando haxa eleccións autonómicas na Comunidade galega. Nunha rolda de prensa ofrecida este luns no Parlamento de Galicia, o xefe de filas dos socialistas galegos asegurou que mentres o Partido Popular galego "segue co xogo da confusión", Vox xa se atreveu " a dicir" que quere "salvar a Feijóo".
"Galicia sabe que as dereitas van tentar sumar coa ultradereita para sumar algún mecanismo que lles permita alcanzar algunha posibilidade de manterse á fronte da Xunta", manifestou o secretario xeral do PSdeG. Este pacto, na súa opinión, suporía un "ataque" directo ao autogoberno e ao galeguismo "extensivo e integrador" que se construíu en Galicia desde que foi aprobado o Estatuto de Autonomía.
O PPdeG, NERVIOSOS
O desembarco de Ortega Smith en Galicia non sentou nada ben nas filas populares. O portavoz parlamentario do PPdeG, Pedro Puy, notablemente nervioso e enfadado ao preguntarlle GC por esta cuestión, defendeu que os populares traballan para manter a maioría absoluta sen entrar "no círculo vicioso das coalicións das inestabilidades". Pero, sobre un hipotético pacto con Vox tras as próximas eleccións autonómicas, rexeitou falar de "futuribles" e non descartou un pacto coa formación de Abascal.
Puy lembrou que "o mesmo señor dixo un día antes que o seu obxectivo era cargarse a Feijóo". Preguntado novamente por GC acerca de se descarta entón un pacto con Vox, replicou que o que fai é non porse nesa tesitura. "Digo que traballamos para outra cousa. Eu non vou pactar con Vox porque non existe en Galicia", argumentou e lembrou que as autonómicas non están convocadas nin el sabe se será candidato.
Por iso, rexeitou falar "de futuribles". "Eu non teño por que dicir algo que non se se vai ocorrer e que o máis probable é que non ocorra dado o éxito que teñen estas persoas na sociedade galega, afortunadamente", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.