Por E.P. | SANTIAGO DE COMPOSTELA | 27/12/2019 | Actualizada ás 17:05
A portavoz nacional do BNG, Ana Pontón, considerou que o anuncio do peche da central térmica das Pontes evidencia a "incapacidade" da Xunta e do Goberno central para defender aos galegos fronte aos "intereses espurios" de Endesa.
Nun comunicado remitido aos medios, Pontón denunciou que Endesa "explotou os recursos naturais gañando miles de millóns de euros durante estes anos" polo que agora "non pode deixar tirada a Galicia nin pode deixar tirada ás Pontes".
Para a líder dos nacionalistas galegos, a responsabilidade do peche da central compete ao Goberno galego e ao Executivo central. "Á Xunta porque non ten ningún plan para facer fronte á transición enerxética" e ao Goberno central porque "segue empantanado na súa indefinición e non ten en conta as particularidades de Galicia en relación co proceso de transición enerxética".
ALTERNATIVAS
Ante iso, a portavoz nacional do BNG deixou claro que a súa formación seguirá reclamando, dentro da súa "axenda galega", que non se produza "un peche brusco da central das Pontes" sen alternativas reais sobre a mesa. Ademais, Pontón reclamou á Xunta medidas para unha transición enerxética "xusta" e que non permita que Endesa "deixe tirado ao Concello e á comarca das Pontes".
Por outra banda, este mesmo venres, o deputado de BNG no Congreso, Néstor Rego, explicou que presentará nos próximos días unha proposición non de lei para esixir ao Goberno español que "Galicia sexa incluída na estratexia da transición xusta nas mesmas condicións e cos mesmos dereitos que Aragón, Asturias e Castela e León".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.