Gómez-Reino (Podemos): "O Goberno que imos facer en Madrid vai repetirse en Galicia" en 2020
Admite ter "moi claro" o perfil do candidato para "liderar o cambio" na Xunta, pero lembra: "Debémonos aos procesos internos".
Por Europa Press / Redacción | Compostela | 29/12/2019 | Actualizada ás 17:59
O secretario xeral de Podemos en Galicia, Antón Gómez-Reino, asegurou que o novo Goberno que o seu partido prevé formar no Estado da man do PSOE "vai repetirse en Galicia" por mor das eleccións autonómicas previstas, salvo adianto, para outono do 2020.
Nunha entrevista concedida este domingo á Cadena Ser, recollida por Europa Press, o tamén deputado de Galicia en Común pola Coruña asegurou que "por suposto" haberá investidura do presidente aínda en funcións, Pedro Sánchez, e que o Executivo de coalición que formarán cos socialistas "vai ser moi positivo" para a Comunidade galega.
"O Goberno que estamos a construír en Madrid vai repetirse en Galicia, e a mellor noticia é que Galicia vai estar no Goberno en Madrid", recalcou.
Preguntado sobre se a tamén deputada galega Yolanda Díaz formará parte dese novo Goberno, tal e como apuntan as quinielas, Gómez-Reino limitouse a responder que "sería unha magnífica noticia para os traballadores" do país. "O fundamental son as medidas", matizou.
Aínda que aínda non hai data para esa sesión de investidura do secretario xeral do PSOE, barállanse datas como o 5 de xaneiro. Pola súa banda, o líder de Podemos en Galicia considera que "canto antes, mellor". "Se é o 5, que sexa o 5, pero en todo caso hai que formalizar canto antes ese Goberno progresista", engadiu.
O TEMPO DE FEIJÓO "ACABOUSE"
De cara ás eleccións autonómicas do 2020, Gómez-Reino dise "convencido" de que o tempo do popular Alberto Núñez Feijóo como presidente da Xunta "acabouse politicamente", polo que estes próximos comicios "decidirán quen vai liderar ese cambio".
Mentres Esquerda Unida (EU) xa seleccionou á súa coordinadora nacional, Eva Solla, como candidata á Presidencia da Xunta, o partido morado aínda mantén a incógnita á espera de se se reedita a coalición entre forzas da esquerda rupturista.
E é que estes dous partidos comparten grupo no Parlamento autonómico con Anova, formación nacionalista que tamén formou parte de En Marea e coa que non conseguiron articular unha candidatura única nas xerais deste 2019.
Así, Gómez-Reino admitiu que con Anova "comparte moito espazo político" tanto na Cámara galega como en moitos concellos, pero mostrouse "escrupuloso cos tempos orgánicos doutras organizacións". "Para vencer a Feijóo non nos sobra xente, senón que nos falta. As portas sempre están abertas", dixo.
PRIMARIAS PARA As ELECCIÓNS DO 2020
Iso si, o líder de Podemos na Comunidade considera que a marca Galicia en Común, terceira forza nas xerais do 28 de abril e do 10 de novembro, "é o espazo" desde o "que coller o carril central".
Nese contexto, Gómez-Reino avanzou que tanto o seu candidato como as súas listas decidiranse a través dunhas primarias, "e a partir de aí formar esa candidatura co resto de actores do espazo político".
Preguntado sobre se lle gustaría ser el mesmo ese candidato á Presidencia da Xunta, o secretario xeral de Podemos Galicia reiterou que é "moi escrupuloso cos tempos das organizacións". "Tanto eu como na miña organización temos moi claro o perfil da persoa que ten que liderar o cambio na Xunta, pero agora mesmo debémonos aos procesos internos", sinalou.
