O administrador de Emesa propón 6 meses de ERTE e activa o proceso para a liquidación mentres se busca comprador

O administrador concursal da fábrica de Emesa, en Coirós (A Coruña), propuxo un Expediente de Regulación Temporal de Emprego (ERTE) de seis meses para os 84 traballadores, á vez que activa o proceso para a liquidación mentres se busca comprador.

Diso informou o presidente do comité de empresa desta fábrica de elaborados metálicos, Alberto Muíño, quen explica que a empresa "está intervida para liquidación", polo que nuns "catro meses" o administrador fará un informe sobre a situación de cara á venda da unidade no seu conxunto.

Respecto diso, este representante dos traballadores cre que esta medida é "a mellor saída", xa que "a liquidación en si non ten porque ser o peche da propia empresa", senón que busca "ser vendida de forma competitiva".

E é que "coa propiedade actual non hai futuro", polo que o obxectivo é que "houbese algún interesado en comprar a unidade de produción, pero sen as débedas que hai".

Esta empresa en concurso de acredores, do Grupo Soil Recovery, conta con 84 traballadores tras o despedimento fde máis de 30 empregados. Ademais, levan "cinco meses" sen cobrar as súas nóminas.

O administrador considera que un ERE de extinción é "unha medida extrema", "e parece que a propiedade pode estar disposta a cambiar o ERE por ERTE".

"Mantivemos a fábrica operativa para traballar en calquera momento", explica Muíño, quen remarca que é unha planta "importante e require un proxecto industrial importante.