Por E.P. | SANTIAGO DE COMPOSTELA | 29/01/2020 | Actualizada ás 19:54
O conselleiro de Economía, Emprego e Industria, Francisco Conde, instou o Goberno estatal a "deixar as escusas" e "aprobar" xa o estatuto para as empresas electrointensivas que permita a continuidade dos postos de traballo neste sector.
O titular de Industria pronunciouse deste xeito en resposta a unha pregunta formulada na Cámara galega pola deputada popular Marta Nóvoa, quen criticou que os grupos da oposición permanezan "calados" ante o atraso da aprobación deste documento, un "agravio" que, segundo indicou, se suma "ao peche da central das Pontes".
En fronte, o conselleiro asegurou que a situación de Alcoa é "especialmente crítica" e lamentou que as medidas trasladadas recentemente polo secretario xeral de Industria á empresa fosen "insuficientes". Tras iso, Conde criticou que agora o Executivo estatal garde "silencio" e subliñou que Galicia necesita "un marco enerxético estable". Ademais, lembrou que a política en materia de enerxía é "competencia do Estado".
Precisamente, conforme indicou, este é un dos "elementos clave" que a Xunta incorporou á "axenda de Galicia" que o Goberno galego trasladou ao Executivo estatal. Neste documento, segundo apuntou, inclúense outras prioridades como a necesidade dunha transición enerxética xusta, unha poxa de enerxías renovables, así como a defensa do sector da automoción.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.