PSOE e BNG ao PP nun debate na Deputación de Pontevedra: "Non aceptaremos leccións en igualdade"

PSOE e BNG avisaron este venres ao PP durante un debate na Deputación de Pontevedra que: "Non imos aceptar ningunha lección de vostedes sobre materia de igualdade, é cuestión de principios".

Os deputados de ambas as formacións rexeitaron unha iniciativa do PP para implantar o teletraballo na Administración provincial. O portavoz do PSOE, Carlos López Font, cualificou a proposta dos populares como a "moción das sorpresas", pois reprocha que o PP retire subvencións a entidades que traballan no ámbito do feminismo ou avoguen polo chamado 'pin parental'. "Cando vostedes falan de igualdade os ollos póñense como pratos", reprocha.

O portavoz do PSOE lembrou que a Deputación de Pontevedra xa conta cun Plan de Igualdade "que xa ten contemplada a implantación da modalidade de teletraballo", polo que pediu ao PP que retire a moción. "A igualdade entrou neste palacio en xullo de 2015", engadiu.

Na mesma liña, o portavoz do BNG e vicepresidente da Deputación, César Mosquera, insistiu en que a posta en marcha do teletraballo "xa está". "Xa o estamos facendo, se tal poderían dicir vostedes que somos un pouco lentos, asumimos esa crítica; o resto é palabrería", censura. Pregúntase se os populares traen esta moción para "lavar a imaxe despois de pactar con VOX".

A presidenta da Deputación, Carmela Silva, advertiu que: "En cuestión de defensa das mulleres eu non permito nin unha broma". A presidenta lembrou que o actual Plan de Igualdade finaliza en decembro deste ano 2020 e a Administración provincial encargou un "estudo rigoroso" sobre o teletraballo "porque noutras institucións apuntouse pouca xente".

POSTURA DO PP

Pola súa banda, a portavoz do Partido Popular, Pepa Pardo, sinalou que este rexeitamento do Goberno provincial á súa proposta "é un voto en contra da conciliación e a igualdade, que para vostedes ten siglas, cor e signo político".

"Deixáronme atónita e anonadada", dixo sobre a reacción de socialistas e nacionalistas. "A nós vostedes non nos dan ningunha lección de feminismo", replicou á súa vez Pardo, do mesmo xeito que PSOE e BNG.

PONTEGAL

O último dos puntos a debate foi a moción do Partido Popular para reclamar á Deputación de Pontevedra que rectifique as bases do catálogo Pontegal 2020 e que tamén inclúa nos solicitantes aos municipios da provincia para solicitar actuacións de grupos e artistas con cargo a este programa. A moción tamén foi rexeitada polos votos en contra do PSOE e o BNG.

Pleno da Deputación de Pontevedra. DEPUTACIÓN DE PONTEVEDRA