GC comeza un programa de colaboración con Desconcierto Cultural

A noticia sobre a publicación da segunda edición do Galician Bizarre é a primeira mostra do programa de colaboración entre Desconcierto Cultural e Galicia Confidencial. Dende hoxe, GC ofrece traducidos ao galego parte dos contidos de desconcierto.com, unha das webs de referencia no país sobre a actualidade musical.

Desconcierto.com é unha revista dixital especializada no panorama musical galego. O portal está publicado pola Asociación Desconcierto Cultural, cuxo principal obxectivo é dinamizar a escea cultural do país, especialmente no referido á música.  O colectivo adica parte dos seus esforzos a organizar concertos polo país. O ciclo TerraZeando e a Romería Pop en Santiago de Compostela son dous dos últimos exemplos.

O apoio do público é quen mantén aberto GC

A colaboración servirá para dotar de máis contidos ao GC Tendencias, a revista cultural que dirixe Paco Gallego para o GC dende o 25 de xullo. GC dá así un paso máis no seu esforzo de construír un medio en galego e 100% independente.

Este portal é arestora o medio en galego máis lido da Internet e o cuarto en Galicia entre todos os editados no país. Só La Voz e Faro teñen máis seareiros nas redes sociais.

Galicia Confidencial carece de calquera mecenas político, sindical, institucional ou empresarial. Leva anos manténdose grazas á axuda dos colaboradores e apoio da audiencia a través das contribucións ao GC Plus, apoio que segue sendo imprescindíbel para manter esta ventá de información libre aberta.