O teatro galego viaxa á Feira Europea de Artes Escénicas de Xixón

Catro compañías procedentes de Galicia foron seleccionadas para presentar os seus últimos traballos escénicos na vixésimo novena edición da Feira Europea de Artes Escénicas para Nenos e Nenas de Xixón.

Así, informaron as entidades, o circo chegará, a partir deste domingo, á cidade asturiana da man das compañías Pistacatro Produtora de Soños e Xampatito Pato que presentarán no marco de FETEN 2020 os seus traballos, 'Mezzo. El fantástico circo de insectos gigantes del Doctor Mezzo' e 'SÓ', respectivamente.

Os primeiros chegan á feira cun espectáculo itinerante "cheo de cor, imaxinación e fantasía para recuperar tanto o espírito de aventura das novelas de Julio Verne como a estética visual dos circos ambulantes do século XIX e principios do XX",explicaron.

Xampatito Pato, pola súa banda, porá en escena 'SÓ', sinalaron, un "personaxe obsesivo e meticuloso que se rodea dunha infinidade de caixas que escapan ao seu control e coas que xoga para dar forma ao seu mundo". "A tolemia cómica, o caos e o universo delirante serán protagonistas deste traballo", abundaron.

As marionetas terán tamén a súa parcela destacada no programa de FETEN a través dos espectáculos de Eme2 Produccións e Os Monicreques de Kukas. "Poético, divertido, áxil e desenfadado, 'Titiricuentos' conta con textos de Ricardo Combi baseados nos contos clásicos 'El ruiseñor', 'Garbancito', 'El zapatero' e 'Los Duendes' que transportarán aos máis pequenos a un mundo con voces de contacontos e corpos de marioneta", indicaron.

Mentres, 'Arlequina' é a montaxe coa que Os Monicreques de Kukas celebra o seu corenta aniversario. O traballo actoral combínase nesta produción coa animación de marionetas, a maxia e a música en directo para contar a aventura de Arlequina, unha marioneta de papel de xornal que buscará a súa identidade coa axuda de Marchelino.

Espectáculo de monicreques