Por Galicia Confidencial | A Coruña | 06/02/2020 | Actualizada ás 09:30
Os refuxiados desprazados serán os protagonistas dunha exposición internacional na Coruña. Unha exposición que porá en marcha Acampa, unha rede transversal, un movemento sen ánimo de lucro en "defensa da paz e o dereito a refuxio". Por iso, require o "traballo voluntario de decenas de persoas que acheguen o seu tempo, o seu coñecemento e a súa ilusión en facer posible que A Coruña sexa por uns días un centro de atención internacional na defensa das persoas desprazadas forzosamente".
A menos de cinco meses desta acción, Acampa busca voluntarios para moi diversas áreas: acompañamento institucional, comunicación e web, loxística, infraestruturas, xestión e administración… “Só fai falta ter ganas e sensibilidade cara a unha realidade que está máis preto do que parece”, explican os promotores da Rede Acampa. “Son moitas as áreas nas que se pode botar unha man, polo que convidamos á cidadanía para regalarnos un pouco do seu tempo e o seu compromiso. Toda axuda é benvida”.
Explican con proxección ao futuro que “queremos que a rede se expanda e poder replicar en outras ciudades e outros países eventos como o que se inaugurará en xuño, unha cita que en só catro edicións consolidouse como un referente internacional na defensa dos dereitos das persoas refuxiadas e migrantes cada vez máis pisados pola onda crecente de xenofobia que arrasa o mundo, e para iso necesitamos recursos”. Non en balde, verase pronto replicada en Madrid, Brasil e Lisboa.
A mediados de xuño, Acampa pola paz e o dereito a refuxio transformará de novo o centro da Coruña nun espazo denuncia da situación das persoas refuxiadas e migrantes e as causas que as empuxan a fuxir dos seus fogares e dos seus países. A organización ten aberto ata este sábado o proceso de selección das exposicións fotográficas sobre o tema que centrará as actividades este ano 2020: o espolio de recursos económicos no planeta e as consecuencias sobre as poboacións locais, que en tantas ocasións vense abocadas á pobreza extrema, o traballo escravo e o desprazamento forzoso. Todos os profesionais da fotografía que queiran participar poderán presentar as súas propostas ata o sábado. A premisa fundamental é que os traballos documenten o tema da edición.
As mostras fotográficas son un dos principais elementos de Acampa para ensinar a realidade das persoas desprazadas e as causas que as empuxan a iso. En cada unha das súas tres edicións, a iniciativa Acampa contou co traballo e a presenza dos e das mellores fotoxornalistas e profesionais da fotografía humanitaria, que explicaron ao público asistente as realidades que documentan en diversos puntos do planeta. As mostras, xa un referente cultural na cidade. Exhíbense durante mes e medio nas dúas principais salas municipais, o Kiosco Alfonso e Salvador de Madariaga, ademais de tomar a rúa no epicentro urbano da Coruña.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.