Suso Díaz: “Eu non faría iso”
O histórico sindicalista e ex secretario xeral de CC.OO. en Galicia rexeita as medidas que o seu sindicato lle propuxo aos traballadores da Forem.
Por Xurxo Salgado | Ferrol | 23/09/2012 | Actualizada ás 17:46
“Eu non faría iso se fora secretario xeral”. Suso Díaz, 68 anos e hístórico de Comisións, acaba de saír en defensa dos traballadores da Forem-Galicia, unha fundación dependente de CC.OO., sobre a que pesa un ERE con despidos e indemnizacións de 20 días por ano traballado. O máximo que impón a lei tras a nova reforma laboral do PP.
Precisamente, Díaz foi un dos que hai uns meses saíu á rúa, convocado polo seu sindicato, para rexeitar esta lei. Por iso, non entende que a dirección de CC.OO.-Galicia queira aplicala, agora, aos seus traballadores. “Sorprendeme moito que Comisións faga iso cos traballadores que teñen a conciencia sindical de CC.OO.”, argumenta en declaracións a GC.
“En desacordo”
Por iso, se amosa completamente “en desacordo” co que está facendo a Executiva do seu sindicato. “Entendo que se reduciron os cartos para a formación, pero iso non se ten que traducir en despidos”, apunta.
Díaz propón outras medidas antes do despido como ERE’s temporais. “O que se trata é de gañar tempo para evitar os despidos que debería ser a última solución”, engade. “E se non hai máis remedio pois haberá que despedir xente pero non baixo a lei que combatimos na rúa”.
Medidas negociadas
Neste sentido, aposta por medidas negociadas; despidos de 40 días de indemnización –como mínimo—por ano traballado “e buscando posteriores recolocacións”. A CIG tamén despediu a 30 traballadores en xuño aplicando esta indemnización e minimizou a resposta dos despedidos.
O ex secretario xeral de CC.OO.-Galicia agarda que este problema poida solucionarse “pola vía do diálogo” e que o sindicato non actúe coma un “patrón”. Por iso, xa falou cos afectados para transmitirlle o seu ánimo e apoio.
Pola súa banda este luns día 24 de setembroos traballadores da Fundación Forem Galicia CCOO comezarán unha folga indefinida cuxo motivo desencadeante é a aplicación por parte da dirección da Fundación do expediente de regulación de emprego cuxo número de despedimentos alcanzaria o 63,10% da actual plantilla.
Os asalariados din que CCOO ofrece "unha indemnización de 20 dias por ano, aplicando deste xeito a reforma laboral pola que venimos mostrando o noso máis profundo desacordo dende fai tempo".
