Por E.P. | SANTIAGO DE COMPOSTELA | 08/02/2020 | Actualizada ás 15:34
A viceportavoz de En Marea, Ana Seijas, confirmou que concorrerán ás eleccións autonómicas deste ano e para iso reiterou a vontade de "diálogo" que manteñen con forzas políticas de carácter soberanista. Iso si, advertiu os acordos deben ser "sempre" nunha "clave de horizontalidade" e en espazos nos que se recoñezan "como iguais".
Así o trasladou na rolda de prensa posterior á celebración este sábado en Santiago do Consello das Mareas, máximo órgano da formación. O seu portavoz, Luís Villares, explicou que esta reunión serviu para "preparar a organización do que está por vir" en Galicia, xa que esta semana se especula cun posible adianto electoral en Galicia se o lehendakari vasco, Iñigo Urkullu, as decide convocar xa para o mes de abril.
Sexan cando sexan os comicios, o portavoz de En Marea recalcou que a "configuración" do seu partido "delimita" as súas posibles alianzas a aquelas forzas "que entenden que o espazo galego é un espazo de decisión" e que teñen a "vontade clara de respectar o ámbito da soberanía" de Galicia.
Neste sentido, Villares xa se manifestou a favor de negociar con Anova e BNG e non con Podemos e Esquerda Unida (EU), partidos que se integraron na marca 'paraugas' de En Marea en sucesivos comicios entre 2015 e 2016. En 2019, esta confluencia terminou por romper.
A pesar desta chamada ao diálogo, a "man tendida" que mantén o BNG non pasa por renunciar ás súas siglas e Anova, aínda que nos últimos días non descartou sumar aos de Villares nas negociacións, mantén contactos con Podemos e EU, os seus socios no Parlamento galego, para reeditar a súa alianza electoral.
"ATENTOS AO RESTO DE ESPAZOS POLÍTICOS"
Ante iso, Ana Seijas afirmou que En Marea "vai concorrer" ás galegas como "forza dialogante": "Se algo nos caracteriza (...) é falar sempre e ter en conta as persoas, pero tamén estar atentos ao resto de espazos políticos":
Ante este escenario de fragmentación, Luís Villares quixo ser "moi claro" ao dicir que, tras a celebración das eleccións galegas, por eles "non vai quedar que haxa un Goberno progresista" en Galicia. "O priotirario é formular unha alternativa a Núñez Feijóo progresista que necesariamente ten que ser cooperativa", engadiu.
Preguntado sobre se a actual situación das forzas de esquerda debilita as posibilidades de desaloxar o PP da Xunta, o xuíz en excedencia cre que "a diversidade no ámbito progresista non é algo que desmobilice, senón todo o contrario", xa que a multitude de ofertas "mobiliza na medida en que cada un pode ver reflectido mellor as súas ansias e imaxe política".
"Galicia chega á modernidade política na que vive tamén o Estado español e Europa co multipartidismo de esquerdas e dereitas", explicou.
Pola súa banda, a recentemente estreada deputada no Grupo Mixto do Pazo do Hórreo e integrante de En Marea Mariló Candedo, tamén presente na rolda de prensa, explicou que no Consello das Mareas deste sábado se debateu un documento que sitúa o partido "onde xa estaba" nos seus comezos: "Nese eixo absolutamente transversal entre o soberanismo e as preocupacións de carácter sociais".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.