Naturgy retira as antenas de media tensión do Castro de Elviña

Operarios da compañía eléctrica Naturgy traballan estes días na retirada das cinco antenas de media tensión do Castro de Elviña, tras outorgar Patrimonio a autorización para sacalas ao entender que "dana a estética dun dos xacementos arqueolóxicos máis importantes do país".

Dous elementos están xa "fóra do perímetro" e a semana que vén contan con extraer os tres que faltan, segundo explica o arqueólogo municipal, Marco Antonio Rivas.

Engade, nun comunicado difundido polo Concello, que desde a Consellería de Cultura estableceron unha serie de medidas cautelares na operación para evitar que se produzan danos nos restos, como a supervisión dun profesional e a instalación de elementos protectores na zona reservada para depositar as antenas.

Rivas lembrou que en 2015 xa se retirou unha antena de alta tensión e que, unha vez leven este tres últimas, a construción quedará limpa de cables.

Imaxe do Castro de Elviña | Fonte: Google Maps