“A revolta dos chupetes” mobiliza a máis dun milleiro de persoas en Cedeira para pedir un pediatra

Unha nova manifestación nun concello galego --e xa van case un ducia-- pola falta dun servizo básico como é o de Pediatría. Desta volta foron os veciños de Cedeira que saíron a rúa para reclamar a Xunta que necesitan un pediatra tras levar máis de seis meses sen el.

Máis de 1000 manifestantes ateigaron as rúas do concello na manifestación que, partindo ás 12:30 do centro de saúde, concluíu na Praza Roxa, onde se leu o manifesto.

Desde a plataforma "En Cedeira, pediatra xa" destacan a “masiva implicación” da vila na manifestación, que “superou todas as previsións”. “Hoxe demostramos que somos un pobo que sabe respostar ás agresións con firmeza e  unidade”, indican. Os manifestantes reclaman que se envíe un pediatra ao Centro de Saúde xa que teñen que desplazarse a Ferrol para poder atender aos seus fillos.

“A revolta dos chupetes non fixo máis que comezar. Logo do respaldo popular acadado hoxe anunciamos novas mobilizacións no entroido, e advertimos de que se non se nos ofrece unha solución intensificaremos as nosas accións, que serán cada vez máis contundentes porque coa saúde das nosas fillas non se xoga”, destacan.

Máis de mil persoas participaron na manifestación de Cedeira para pedir un pediatra | Fonte: Revolta dos chupetes