Fundación Amigos de Galicia nega entregar alimentos caducados a persoas necesitadas

Toma a decisión de deixar de distribuír directamente alimentos perecedoiros tras a inspección realizada por Sanidade no seu almacén central en Vilagarcía de Arousa.

Por Europa Press / Redacción | SANTIAGO DE COMPOSTELA | 24/02/2020 | Actualizada ás 18:51

Comparte esta noticia

A Fundación Amigos de Galicia deixará de distribuír directamente alimentos perecedoiros entre as persoas necesitadas tras a inspección realizada por Sanidade no seu almacén central en Vilagarcía de Arousa, no que se detectaron numerosas irregularidades e deficiencias para levar a cabo este labor.

Membros da Fundación Amigos de Galicia coa secretaria xeral de Igualdade, Susana López Abella.
Membros da Fundación Amigos de Galicia coa secretaria xeral de Igualdade, Susana López Abella.

"Sanidade ten toda a razón, polo que nos vemos obrigados a cambiar o operativo de distribución de alimentos", asegurou o presidente da Fundación, Manuel Busto.

Busto asumiu que as instalacións de Vilagarcía desde as que se distribuían os alimentos perecedoiros para toda Galicia non permiten garantir a rastrexabilidade nin contan con cámaras frigoríficas que posibiliten manter a cadea de frío. "Ao tratarse dunha nave aberta, mesmo hai feces de roedores", indicou.

En 2019, a Fundación Amigos de Galicia repartiu máis dun millón de quilos de alimentos e atendeu a 37.456 persoas, das que 13.480 eran menores. O seu presidente recoñeceu que, tras esta decisión, a cifra de persoas beneficiarias vai descender sensiblemente pero que non por iso se vai deixar de cumprir, na medida do posible, a función social que veñen realizando. "Tentaremos buscar fórmulas para poder seguir dando viabilidade a este proxecto", sinalou.

Unha delas, adiantou, sería a cobertura desas necesidades alimenticias a través de vales de compra válidos nos supermercados concertados, cos que as persoas usuarias poderían comprar os produtos frescos.

"A maioría dos alimentos perecedoiros que distribuïamos comprabámolos nós e ímolos seguir comprando", esgrimiu, antes de engadir que "o que vai cambiar a partir de agora é que, no canto de almacenalos nós para despois repartilos, teremos unha tenda en cada concello e as persoas irán buscalos alí, pero seguirá pagándoos a fundación".

PROHIBICIÓN DE ETIQUETAXE

Con este novo modelo de distribución, Amigos de Galicia vese obrigada a renunciar ás doazóns de alimentos perecedoiros que ata agora recibía, xa que Sanidade lles prohíbe expresamente recibilos, manipulalos e almacenalos para a súa posterior repartición.

"Tampouco se nos autoriza a etiquetaxe de produtos", recoñeceu o presidente da entidade. Labor que a fundación realizaba cos produtos frescos recibidos de doazóns a granel ou de doazóns como as procedentes da pesca deportiva. "Non eramos conscientes de que non podiamos etiquetar ese produtos. A nosa intención sempre foi a de informar as persoas que reciben a nosa axuda dos produtos que entregabamos, produtos que sempre estaban en bo estado", indicou.

A fundación si que se seguiría encargando directamente da distribución alimentos non perecedoiros, así como produtos de limpeza, hixiene persoal e vestimenta.

En canto á nave de Vilagarcía de Arousa, cuxas malas condicións foron detectadas por Sanidade, a Fundación asegura que dita instalación será utilizada de momento, para a almacenaxe de mobles e dos tapóns obtidos nas súas campañas de recollidas solidarias.

PRODUTOS CADUCADOS

O presidente da Fundación Amigos de Galicia negou que desde a entidade se entregaran nalgunha ocasión produtos alimenticios caducados. "É certo que recibimos grandes cantidades de alimentos doados por empresas cunha data de consumo preferente curta, principalmente leite e iogures, pero sempre se informou ás persoas usuarias desa data de consumo, sendo vontade dos beneficiarios recollelos ou non", subliñou.

Busto engadiu, ademais, que a fundación traballou sempre en colaboración cos departamentos de servizos sociais dos concellos e que todos os produtos alimenticios entregados "eran revisados e supervisados polo persoal dos mesmos, sendo estes quen os entregaban".

O presidente da entidade incidiu en que "a Fundación Amigos de Galicia sempre actuou e actúa de boa fe, sendo conscientes da achega que estamos a realizar ás persoas en risco de exclusión social de Galicia". E destacou que "en 25 anos que levamos traballando neste programa nunca tivemos ningún problema de intoxicacións".

Manuel Busto recoñeceu que a Fundación Amigos de Galicia conta cunha partida de alimentos caducados nun almacén en San Cibrao das Viñas, en Ourense. "Pero estes produtos estaban almacenados para a súa destrución e nunca coa intención de ser entregados", puntualizou.

Os produtos caducados son, principalmente, pexego, xudías e tomates procedentes dunha partida moi abundante recibida no ano 2015, á que por motivos de restrición nas entregas, non se lle puido dar saída no seu momento.

No almacén ourensán achábanse ademais outras pequenas partidas de produto procedentes de doazóns que pola súa curta caducidade tampouco puideron ser entregados en data.

DOCE PERSOAS AO PARO

O cambio de operativo en canto á distribución de alimentos perecedoiros vai implicar a perda do posto de traballo de doce persoas, actualmente contratadas por Amigos de Galicia. O seu presidente manifestou o seu pesar por esta circunstancia e a súa confianza de que poidan reintegrarse o máis pronto posible ao mercado laboral grazas aos programas de emprego que desenvolve a fundación.

Amigos de Galicia, asegurou Manuel Busto, manterá os seus programas de emprego, así como os dirixidos a mulleres en situación de vulnerabilidade, atención a persoas maiores que viven soas e, en especial defensa, á defensa da infancia.

"Ante a gran demanda que temos, a nosa intención sempre foi a de chegar ao maior número de persoas posible, e a nosa boa vontade levounos a crecer en demasía sen contar cos medios oportunos. Sentímolo profundamente por todas as persoas que se benefician deste programa", remarcou.

Manuel Busto asegurou que, "desde a entidade asúmese que todo o traballo que se fai é mellorable, pero sempre foi honesto na xestión". E mostrou a súa preocupación pola imaxe da Fundación Amigos de Galicia, así como doutras entidades que directa e indirectamente se ven afectadas con esta noticia".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta