A Xunta quere adiantarse ao coronavirus, aínda que as 100 analíticas realizadas en Galicia deron negativo
Mercarán equipamento para reforzar os hospitais das cidades e comarcais.
Por E.P. | Santiago de Compostela | 01/03/2020 | Actualizada ás 16:27
O Consello da Xunta autorizará na súa próxima reunión, prevista para o xoves, t, un "expediente de compra por emerxencia" de equipamento para "anticiparse" á chegada a Galicia dos primeiros casos de coronavirusal e como anunciou este domingo o conselleiro de Sanidade, Jesús Vázquez Almuiña.
Tras participar por videoconferencia na reunión do Consello Interterritorial sobre coronavirus, Vázquez Almuiña avanzou que a compra será "inmediata" para reforzar o equipamento nos hospitais galegos das grandes cidades e comarcais. Procuran estar preparados ante posibles casos, aínda que Galicia é, xunto coa Rioxa, Murcia e Aragón, unha das catro comunidades que permanecen libres da propagación deste virus.
A compra de equipamento (como respiradores ou aparellos de raios para os servizos de emerxencias) foi unha das necesidades detectadas polo grupo de expertos creado en Galicia para o seguimento do brote. Preguntado pola partida que se destinará a este reforzo de equipamento, Vázquez Almuiña indicou que aínda están na fase de completar todo o expediente.
Así mesmo, o Servizo Galego de Saúde (Sergas) emprendeu o reforzo de persoal no 061, nos servizos de microbioloxía, en medicina preventivo e nos equipos creados para a toma de mostras en domicilios.
Polo momento, Sanidade tampouco concretou exactamente con cantos efectivos máis se conta e ata cantos se podería chegar, aínda que Vázquez Almuiña afirmou que a distribución do persoal realizarase por área sanitaria e incorporarase segundo as necesidades.
OUTRAS MEDIDAS
Pola súa banda, a comisión interdepartamental para o seguimento do coronavirus COVID-19 e outras enfermidades emerxentes reunirase este luns coa participación de representantes de consellerías como Educación, Política Social, Economía ou Vicepresidencia para garantir a coordinación e impulsar actuacións que se consideren necesarias, máis aló do ámbito estritamente sanitario.
En calquera caso, a posible chegada de casos de coronavirus a Galicia coincide con que está "en franco retroceso" o pico da gripe e "pasou a sobrecarga" asistencial por este motivo, tal e como comentou o subdirector xeral de Información sobre saúde e Epidemioloxía, Xurxo Hervada.
Na Comunidade galega xa se realizaron máis de 100 analíticas e todas deron negativo en coronavirus. No entanto, as autoridades sanitarias insisten en que se extreme a hixiene de mans, cun lavado frecuente, especialmente despois de toser ou sonarse. Piden tamén que se cubra o nariz e a boca coa cara interna do cóbado ou cun pano -preferentemente desbotable- ao toser ou estornudar.
DESCARTAN IMPACTO SOBRE A INDUSTRIA
Ademais, o conselleiro de Emprego e Industria, Francisco Conde, asegurou nunha entrevista á Radio Galega que as empresas da comunidade non trasladaran "ningunha preocupación polo impacto directo" que o coronavirus provoca na industria galega. Así e todo, "teñen que facer un seguimento para que non se produza" este efecto e, en caso de que finalmente ocorra, para que se poida "atenuar".
